Möxämmät Päyğämbär karikaturaların berençelärdän bulıp küçerep bastırğan ber Norvegiä jurnalı möxärrire bügen möselmannardan räsmi räweştä ğafu ütende.
Vebjoern Selbekk Daniä basmasında çıqqan räsemnärne Magazinet jurnalında küçerep bastırunı moñarçı yaqlap kilsä dä, xäzer bu ğämälneñ möselmannar öçen ni qädär awır buluın añlamağanmın di.
Osloda matbuğat oçraşuında ul Norvegiä İslam Şurası räise Möxämmät Hamdan belän qul qısıştı. Hamdan ğafu ütenüne qabul itte häm monnan arı Selbekka yanağan keşe İslam Şurasına yanağan dip sanalaçaq dide.
Dönyanıñ başqa urınnarında karikaturalarğa protest çaraları, demonstratsiälär däwam itte. Malayziäneñ iñ zur şähäre Kuala Lumpurda Daniä ilçelege qarşında 3 meñläp keşe protest bedlerde. İslamabad häm Dakadağı protest çaralarında 5-är meñläp keşe qatnaştı.
