Musa Cälilneñ 100 yıllıq yubiley böten cirdä dä kiñ itep ütkärelgän waqıtta, mäskäwlelär dä bu waqiğanı çitlätep uzmadı, aldan äzerlänep tordı. Mäskäw cämäğätçelege 12 fevral' könen tulısı belän Musa Cälilneñ yubiley çaralarına bağışladı. İrtänge yaqta Musa Cälil yäşägän Stoleşnikov tıqrığında urnaşqan 11 yort yanına çäçäklär salu buldı. Bu yort stenasında Mäskäw tatarları tırışlığı belän berniçä yıl inde biredä şağir Musa Cälil yäşägän digän taqta elenep tora. Çäçäklär salğannan soñ, yubiley çaraların oyıştıru komitetı, kilgän qunaqlar häm ğalim yazuçılar qatnaşında milli mädäni üzäktä Musa Cälilneñ tormışı , icatına bağışlanğan fänni-ğamäli konferensiä uzdı. Konferensiädän soñ yubiley qunaqları Mäskäw sınçısı Qädim Cämilov mädäni üzäkkä büläk bularaq yasağan Musa Cälil sının açuda qatnaştılar.Ul çaralardan soñ inde tantanalı utırış başlanıp kitte. Säxnä turendä Milli mädäni möxtäriät äğzäse Kärim Şakirov yazğan Musa Cälil räseme elengän ide. Mädäni üzäkneñ zur zalı xalıq belän şığrım tulı ide ul könne. Alar arasında ataqlı millättäşlärebez dä, Tatarstannıñ wäkälätle wäkile Nazif Mirixanov ta, Mäskäw xökümäte räsmiläre dä, Rusiä yazuçılar berlege wäkilläre dä, Musa Cälilneñ polktaşları, anı kürep tanıp belgän, elekke Asadullaev yortında uqığan olı yäştäge millättäşlärebez dä, Qazannan yazuçı Rafayıl Mostafin , şulay uq Musa Cälilneñ qızı Çulpan häm onığı Tat'yana da bar ide. Çulpan xanım üzeneñ çığışında ätiseneñ isemen tanıtqan, anıñ icatın xalıqqa qaytarunı yärdäm itkän keşelärgä räxmäten belderde. Ayırım alğanda Çulpan xanım Cälilova Andre Timermans ğailäsenä, italiä häm Germaniä ğalimnärenä, şulay Ğazi Qaşşaf, Rafayıl Mostafin häm Abdulxan Äxtämcanğa da räxmätlären äytte.
Başqalar rusça söyläsälär yazuçı, Musa Cälil turında berniçä kitap avtorı Rafail Mostafin tatarça çığış yasadı häm ul boday dide: “Faşistlar cälilçelärne Germaniä ciñgännän soñ sezgä “İdel-Ural” däwläte tözep biräbez dip aldağannar. Ä inde yäşeren dokumentlarda Rusiäne tulısı belän basıp alğan oçraqta, ğomumän, bernindi dä milli däwlät buldıru qaralmağan. Musa Cälilneñ batırlığın faşistlarnı ciñgän barlıq xalıqlar da üz batırlığı itep qabul itä. Şunıñ öçen dä bez anıñ aldında baş iäbez , dide. Ä inde Musa Cälilneñ sının täqdim itkännän soñ ul avtor Qädim Cämitovnın eşen maqtap, çınlap ta bu sında Musa Cälil obrazı tirän yaqtırtılğan” dip belderde.
Bu oçraşuda çığış yasawçılar küp buldı.Top xisapnı soñğı yıllarda Musa Cälilneñ tormışı belän nıq qızıqsınu kürsätkän professor Abdulxan Äxtämcan yasadı. Ä inde oçraşunı alıp barğan Milli mädäni möxtäriät räise räsim Aqçurin tantanalı cıyılışnı Musa cälilneñ yäşlek dustı, üze isän çağında istäleklären berqayda bastırıp çığara almağan şağirä Möbinä Tahirova şiğere belän tämamladı.
12 fevral' könne Musa Cälilneñ 100 yıllığına bağışlanğan tantanalı kiçädä şağirneñ şiğerlären söylädelär, anıñ süzlärenä yazılğan cırlar Bol'şoy teatrdan Marat Galiäxmätov, Tatarstannıñ xalıq artistçası klara Xäyretdinova, Mäskäw cırçıları Roza Xäbibullina häm Nailä Fatixova başqaruında yañğıradı.
Ä inde tantanalı yubiley kiçäse barlıq cırçılar häm xalıq qatnaşında Musa Cälilneñ Salix Säydäşev muzıkasına yazılğan“Cırlarım” digän cırın başqaruında tämamlandı.
Näzifä Kärimova, Mäskäw
