Başqortstannıñ Berläşkän oppozitsiäse koordinatsiä şurasınıñ bu atnanıñ çärşämbesendä ütkärgän kiñäşmäse xaqında xäbär itkän idek inde. Anda qatnaşuçılar 4 martta Ufada qarşılıq çarası ütkärergä kileşte. Oppozitsiä köçläreneñ bıyıl kiñ qolaçlı oyıştırıluçı şundıy täwge uram cıyınında, nigezdä, ike mäs'älä kütäreläçäk. Berençese- toraq-kommunal' xezmätlärgä xaqlarnıñ bik nıq artuına rizasızlıq, ikençese – Başqortstanda keşe xoquqları bozıluğa cämäğätçelek iğtibarın tağın ber qat cälep itü.
Başqortstanda uram cıyınnarın ütkärü xaqında bıltır qabul itelgän yaña qanun nigezendä mitinglarğa çığu xäzer qatlawlı eşkä äylände. 500дән artıq keşe qatnaşa torğan cıyın ütkärü öçen xäzer respublika Xökümätenä möräcäğät itärgä kiräk. Başqortstan Berläşkän oppozitsiäse Koordinatsiä şurası räise häm ber ük waqıtta Başqortstan Tatar milli-mädäni möxtariäte citäkçese wazifaların başqaruçı Ramil Bignov süzlärençä, comğa könne respublika Xökümätenä şul möräcäğät tapşırılğan. Aña nindi cawap alınaçağı mäğlüm tügel. Möğayın, 4 martqa bilgelängän qarşılıq çarasın oyıştıruğa rizalıq birmäskä dä mömkinnär, di Ramil äfände. Yä inde rizalıq birsälär dä, Ufa şähäre xakimiäte qarşındağı bez sorağan üzäk mäydanda tügel, ä qaydadır xalıq az yörgän ber çittä genä genä birüläre ixtimal.
Niçek kenä bulsa da, oppozitsiä köçläre mart başındağı berençe kiñ qolaçlı uram cıyınına äzerlekne bügennän ük başlağan. Anı oyışqan töstä ütkärü turında söyläşü öçen, comğa könne çirattağı kiñäşmä ütkän. Bu xaqta Başqortstan Tatar milli-mädäni möxtariäte räise urınbasarı Mäcit Xucin xäbär itte. Alay ğına da tügel. 4 mart könne tağın ber cıyın ütäçäk, di Mäcit äfände. Ufa tatar milli-mädäni möxtariäte bu könne piket ütkärergä cıyına. “Anda Başqortstan tatarları problemaları kütäreläçäk, - di Mäcit Xucin. – Tatarlarnıñ milli-mädäni ixtıyaçlarına bernindi iğtibar birelmi. Şuña kürä dä bu mäs’älälärgä dä cämäğätçelek iğtibarın cälep itärgä kileşende”.
M. Xucin:Bez bu piketqa 18 lozung alıp çığarğa dip kileştek. Alar barısı da Başqortstan tatar xalqı mänfägat'lären küz uñında totıp yazılğan. Respublikada tatar balaları üz telendä belem alırğa tieş. Tatar xalqı üz mädäniäten üsterü mömkinlegenä iä bulırğa tieş. Prezident Räximov isemenä dä belderülärebez bar. Başqortstan Tatar milli-mädäni möxtariäte räise urınbasarı, professor Mäcit Xucin buldı bu. Kiläse atnada tatar milli oyışmaları 4 martta ütäçäk piketqa äzerlek barışın tikşerü öçen tağın ber utırış ütkäräçäk.
Fänis Fätxi, Ufa
