Accessibility links

Кайнар хәбәр

Türk Hava Yolları Qazanğa oça başladı


Tatarstan belän Törkiäneñ araları tağı da yaqınaya. «Törek hawa yulları» şirkäte Tatarstanda eşli başladı. Şirkätneñ reklam kompaniäse, «Qazannan İstanbulğa, annan böten dönyağa» digän şiğär belän bara. Monnan 8 yıl elek, älege şirkät, Tatarstanğa kilep uñışsızlıqqa oçrağan bulsa da, bu yulı, «Törek hawa yulları»nıñ biznesnı üsterergä ömetläre zur.

«Törek hawa yulları»nıñ Tatarstanda eşli başlaw waqiğası däwlät däräcäsendä bilgeläp ütelde. Qazanğa Törkiäneñ Rusiädäge ilçese kilde, Qazandağı konsul buldı, Törkiädän deputatlar, İstanbul şähär deputatı, biznes wäkilläre cıyılıp kilde. Eşne başlaw uñayınnan Qazanda, biş yoldızlı «Miraj» qunaqxanäse binasında oçraşuı ütkärelde. Anda Törkiä qunaqları, yaña şirkätneñ eş tärtibe häm Tatarstanda eşli başlawnıñ ähämiäte turında süz alıp bardı. Qunaqlarnıñ çığışlarınnan añlaşılğança, «Törek hawa yulları» Tatarstan bazarında inde bulğan «Tatarstan» häm «Lufthansa» hawa şirkätläre belän köndäşlek itärgä cıyına. «Tatarstan» Törkiägä, atnağa ike genä tapqır oçuçı, berdänber hawa şirkäte ide. Anıñ da, oçqıçları härwaqıt tulı bulmadı. Ä Yevropa illärenä, qazanlılar «Lufthansa» belän säyäxät itte. İnde xäzer, «Törek hawa yulları» ike yünäleşkä dä häm başlağan waqıtta, arzanraq bäyägä yörergä täqdim itä. Mäsälän, Törkiä şirkäte, xäzergä, Tatarstannıqınnan 40 dollarğa arzanraq bäyä quyğan. Qazannan İstanbulğa oçıp baru häm kire qaytunı bu şirkät $299 täqdim itä. Yaña ğına Tatarstan bazarına kergän şirkät wäkilläre, matbuğat oçraşuında, tatar häm törek xalıqları arasındağı ruxi, mädäni urtaqlar turında küp söyläde. Ämma, biznes başlağanda, tel häm mädäniätkä genä tügel, eşmäkärlärneñ, turistlarnıñ, räsmi wäkilläreneñ Törkiä belän Tatarstan arasında yörep torularına ömetlänä alar. Törkiäneñ hawa yulları şirkäte başlığı urınbasarı Xälil Töker, şirkät, älegä atnağa ike tapqır oçarğa cıyına, soñınnan, reyslarnıñ sanın, kön sayın däräcäsenä qädär artırrığa ömetlänä, dip xäbär itte. Jurnalistlar, 8 yıl elek, ber tapqır eşne başlağan idegez, bu yulı da uñışsızlaqqa oçrasız dip kurmyısızmı, dip qızısındı. Şirkät wäkile bolay cawap birde. : « Äye, sez xaqlı, 1997 yılda «Törek Hawa yulları» iqtisadıy krizisqa oçrağan ide. Ämma anda bezneñ ğäyep bulmadı, dönyadağı xäl şundıy buldı. Bezgä mondağı bülekne yabarğa turı kilde. Ämma bu yulı bez, yañadan açılğanda, eşli alırbız, kön sayın oça alırbız, dip ışanabız. Soñğı 3 yılda «Törek hawa yulları üzeneñ mömkinelkären küpkä artırdı häm Kazaxstan, Yämän, Sudanğa oçuçı berdänber şirkät bulıp tora. »

Şirkät wäkile Xälil Tökerneñ äytäünçä, «Törek hawa yulları» tranzit oçışlarğa ömet tota. Qazannan, İstambul aşa, dönya şähärlärenä oçıp barırğa, Tatarstanğa da turistlar kilü öçen dä bu uñay yul bulır, digän fiker belderelde matbuğat oçraşuında.

Türkiäneñ Rusiädäge wäkile Qurultaş Taşkent, bu şirkätneñ Tatarstanda eşli başlaw waqiğasın bik yuğarı bäyäläde. Ul, Qazan, Törkiäneñ aqçaları kergän, xezmäte quyılğan, Mäskäwdän soñ, ikençe Rusiä şähäre buluın xäbär itte. «Qazannıñ 1000 yıllığında, Törkiä tözüçeläre barlıq eşneñ 80% başqardı. Küptän tügel, «Qızıl Şärıq» şirkäte Törkiä biznes şirkäte qulına küçte», dip iskä töşerde Qurultaş Taşkent.

İstanbul parlamentı deputatı Nusret Bayraktar, üzeneñ çığında, Tatarstan belän Törkiä aralarınıñ yaqınayuın, tarixi waqiğa itep atadı. Bezneñ xalıqlar arasında urtaqlıq küp häm bez alarnı monda kilep küräbez, dide. Matbuğat oçraşuınnan soñ oyıştırılğan mäclestä, Tatarstan deputatları, Tışqı xezmättäşlek deportamentı citäkçese, respublikanıñ Törkiädäge wäkile, Qazandağı turistik şirkätlär citäkçeläre qatnaştı. Törek häm tatar cırları başqarıldı, qunaqlarğa törek aşları birelde.

Bikä Timerova

XS
SM
MD
LG