Başqortstannıñ Tuymazı rayonında zur ğına qaza buldı. “Uralsibnefteprodukt” şirkätenä qarağan Nijnevartovsk-Kurgan-Kuybıyşev neft' ütkärgeçe yarılıp kitü säbäple, anda 500 kvadrat metr mäydanda 1000 kubometrğa yaqın neft' cirgä aqtı. Çärşämbe könne töştän soñ bulğan ul häläkätneñ näticälären beterü äle dä däwam itä. Bäxetkä kürä, neft' ütkärgeçtäge qaza waqıtında yanğın çıqmağan. Bu andağı eşlärne alıp barunı ansatlaştıra. Başqortstannıñ Ğädättän tış xällär ministrlığı wäkilläre belderüençä, avariä urının tazartu eşläre şuşı atnanıñ şimbä-yakşämbe könnärenä qädär barırğa mömkin. Qazanı beterügä, nigezdä, “Uralsibnefteprodukt” şirkäte eşçeläre cälep itelgän. Belgeçlär fikerençä, ağıp çıqqan neft' yılğağa qädär barıp citmägän. Şul tirädä genä Bişende digän bik matur yılğa bar. Xäzer neft' şul yılğağa töşmäsen öçen, ul yaqqa yasalma yar öygännär. Bu eştä 200 dän artıq keşe köne-töne digändäy tuqtawsız tırışlıq kürsätä. Xäyerçegä cil qarşı digändäy, soñğı ike köndä Başqortstanda kinät cılıtıp cibärde häm qar di tiz genä eri başladı. Bu isä cıyıp betelmägän neft'le qarnıñ erep barıber dä cirne nıq qına pıçratu qurqınıçın arttıra. Yazğı sular belän neft' qaldıqları Bişende yılğasına da töşärgä mömkin. Ämma zıyannı zurğa cibärmäw öçen bar mömkinleklär faydalanıla, dip ışandıra Ğädättän tış xällär ministrlığı wäkilläre.
Fänis Fätxi, Ufa
