Accessibility links

Кайнар хәбәр

Miloşeviş tuğan qalasında cirlände


Ber atna elek Haag törmäsendä yöräk öyänägennän wafat bulğan Yugoslaviäneñ elekke citäkçese Slobadan Miloşeviş bügen tuğan şähäre Pojarevats''ta cirlände. Belgradta ütkän xuşlaşu möräsimenä anıñ distälägän meñ tarafdarı cıyıldı. Serb millätçeläre öçen ul qaharman bulsa, dönyanıñ başqa öleşe öçen – suğış cinäyätçese.

Miloşeviçnıñ tarafdarları, ul Serbiä Watanı dip äytergä yaratqan törle töbäklärdän kilde, Serbiä häm Çernogoriä, şul isäptän Kosovodan ğına tügel, ä Xorvatiä belän Bosniäneñ dä serb töbäklärennän. Miloşeviçnıñ Serb millätçelären xuplaw, etnik tazartu säyäsäte, näticädä uzğan ğasırnıñ 90nçı yıllar başında Balkanda qupqan 4 suğış näticäsendä yözlägän meñ keşe, şul isäptän meñlägän möselman häläk buldı, millionlağan keşe yort-qurasız qaldı.

Küplär öçen ul suğış cinäyätçese bulsa, serb millätçeläre anı qaharman dip atıy. Misal öçen Bosnia serblarınıñ Pale qalasınnan kilgän Miloş Lazareviç: "Ul serb xalqı häm bar Serbiä xaqına batırlarça suğıştı. Şuña kürä anı üterdelär dä, häm ruxi häm cismi mäğnädä", di ul.

Bügenge xuşlaşu möräsimen Miloşeviçnıñ Sotsialistlar partiäse oyıştırdı. Bu partiä Serbiädä äle dä köçle bulıp qala. Federal parlament binası aldına quyılğan Miloşeviç tabutı yanınnan meñlägän keşe ütte. Zur ekranda anıñ süräte kürsätelep tordı.

Serbiäneñ xäzerge xökümäte - 2000 yılda Miloşeviçnı bärep töşergän Könbatış taraflı demokarlar – däwlät külämendä cenaza ütkärügä qarşı çıqtı. Comğa könne Miloşeviçnıñ köndäşläre anıñ qarañğı mirasın iskä alıp açıq xat bastırdı. "Yalğan häm urlawlar, meñlägän keşeneñ tügelgän qanı, qurqıtu häm bilgesezlek, tormışqa aşmağan xıyallar, cimerelgän tormışlar, bezdän soramıyça, bezneñ isemnän başlağan suğışlarığız, bezneñ öskä awdarğan bar ğazaplar öçen sezgä zur räxmät" dielgän bu xatta.

Miloşeviçnıñ xäzerge waqıtta Mäskäwdä yäşägän ğailäse – qulğa alınudan qurqıp – cenazağa qaytmadı.

Ali Gilmi
XS
SM
MD
LG