Accessibility links

Кайнар хәбәр

İcadi üseş texnologiäse buyınça uqıtunı Rusiä töbäklärenä kertü dä küzdä totıla


İcadi üseş texnologiäse buyınça programma berniçä yıl elek eşlängän. Psixologiä fännäre doktorı Äxmät Räximov tarafınnan. Xäzerge waqıtta anıñ buyınça uqıtu respublikadağı 56 mäktäptä alıp barıla. Şul mäktäplärdä 1-3 sıynıfqa qädär uquçılar tatar tele, matematika, älifba häm tabiğät beleme fännären icadi üseş texnologiäse programması buyınça üzläşterä. Äxmät Räximov äxlak beleme buyınça da däreslek çığarırğa kiräklegen äytte. Tatarstan mäğärif häm fän ministrlığı belän inde kileşelgän.

İcadi üseş texnologiäse eksperimentı yäğni täcribä uzdırunıñ maxsus baza mäktäpläre dä buldırılğan. Alar xäzer respublikada tuğızaw. Şunıñ berse Baltaç rayonı Salawıç urta mäktäbe. Anıñ direktorı Lyutsiä Zakirova

Uqıtuçı barı idäräçe genä, uquçılar törkemnärgä bülenep eşli. Alar härwaqıt eştä. Üz fikerlären äytergä çitensenmilär. Ägär berse çitensensä ikençese yärdäm itä.

“Tügäräk östäl”dä icadi üseş texnologiäse buyıñça eksperiment respublikada uñışlı bara dip bilgeläp uzıldı. Anı kiläçäktä Rusiä töbäklärendäge tatar mäktäpläre häm sıynıflarına kertü dä küzdä totıla. Mart azağında Bötenrusiä uqıtuçılar qorıltayında bu mäs'älädä söyläşü bulır dip kötelä. Bu xaqta Tatarstan mäğärifne üsterü institutı citäkçese İlsur Hadiullin äytte. Ul barlıq tatar balaların icadi fikerlärgä öyrätergä kiräk, üz qatğiy fikeren äytä belergä tieşlär dide. Çönki rus balaları öçen bügen törle programmalar bar.

“Tügäräk östäl”dä icadi üseş texnologiäse buyınça belem aluçı balalarnıñ barı yaxşı bilgelärgä genä uquı assızıqlandı. Şulay uq mondıy uqıtu balalarnıñ tärtipläre häm sälämätleklärenä dä uñay tä'sir yasawı äytelde. Bu maxsus anketalar yärdämendä bilgelängän.

Landış Xarrasova

XS
SM
MD
LG