Sverdlovski ölkäsendä tolerantlıq kul'turasın üsterü buyınça Rossiä – Almaniä urtaq proyektı qısalarında iğlan itelgän jurnalistlar bäygese tämamlandı. Şuşı könnärdä Yekaterinburg şähäreneñ Tınıçlıq häm Duslıq yortında bäygeneñ näticäläre buyınça matbuğat konferensiäse oyıştırıldı.
Mäğlüm bulğança, “Tolerantlıq kul'turasın üsterüdä Sverdlovski ölkäse ğämmäwi mäğlümat çaralarınıñ role” dip atalğan bu bäyge uzğan yılnıñ iyül ayında iğlan itelgän ide. Jurnalistlar tolerantlıq problemaların törle yaqlap yaqtırtqan materialların 1 fevral'gä qädär wäkälätle jyuri xökemenä tapşırırğa tieş buldılar. Nigezlämä buyınça, bäygedä öç nominatsiädä ciñep çığuçılar Auropa Komissiäse xisabına Almaniä cirenä stajirovka ütärgä barırğa tieş ide.
Bäygeneñ näticälären iğlan itü buyınça matbuğat konferensiäsen jyurinıñ Rossiä yağınnan räise Vadim Dubiçev, Almaniä yağınnan Ul'rix Şteven, jyuri äğzaları Xayko Fritsşe häm Yevgeniy Kasıymov kildelär. Ul'rix Şteven xäbär itüençä, jyurida 14 keşe eşlägän. Alar konkursta qatnaşuçı 18 jurnalistnıñ eşenä bäha birgännär.
Jyuri äğzaları bu qatlawlı bäygedä qatnaşqan öçen jurnalistlarğa zur räxmät belderdelär. Alar fikerençä, jurnalistlar öçen bu tema älegä ör-yaña. Älege bäyge alarnıñ iğtibarın tolerantlıq temaların yaqtırtuğa yünältergä yärdäm itte. Şuña kürä, alar öçen äle eş başlana ğına. Härxäldä, jyuri moña zur ışanıç belderde.
Bäyge näticäläre buyınça ciñüçelär bulıp ike elektron mäğlümat çarası wäkile, ber basma mäğlümat çarası wäkile tanılırğa tieş. Ul'rix äfände, elektron mäğlümat çarası nominatsiäsendä ciñüçelärneñ eşen bäyäläp, alarnıñ qayberäwlär tanırğa da telämägän genotsid problemasın qurıqmıyça kütärep çığuların äytep uzdı.
Şähär televideniese kanallarınıñ bersendä eşläwçe jurnalist Artur Bagas'yan, üzeneñ “Urartu näselläre” dip atalğan tapşıruında monnan 100 yılğa yaqın elek bulğan ärmän xalqı faciğäseneñ bügen dä çağılıp alğalağan küreneşlären taswirlağan. “Kümäk añ, kümäk yazmış” digän töşençälär bar ikän, näq menä şuşı tapşıruda alarnıñ ni ikänlegen añlıysıñ”, - dide Ul'rix Şteven.
Elektron mäğlümat çaraları arasınnan tağın ber ciñüçe bulıp berençe qaraşqa qorı, yalıqtırğıç toyılğan migratsiä temasın añlayışlı, mawıqtırğıç itep yaqtırta alğan, “Milli ülçäm” dip atalğan millätara televizion tapşıru citäkçese Larisa Kozlova tanıldı. Ä waqıtlı matbuğatta basılğan mäqälälär arasınnan jyuri iğtibarın ölkäneñ mari milli oeşması citäkçese Sergey Nikitin yazması cälep itkän.
Avtor etnik törkemnär problemalarınıñ massaküläm mäğlümat çaralarında östän-östän genä yaqtırtıluın, milli tellärdä tapşırular yasaw öçen däwlät yärdäme bulmawı turında äytep ütkän. Monnan tış, Sergey Nikitin milli oyışmalar citäkçeläreneñ, aktivistlarnıñ bu eştä tieşle köç quymawlarına ükeneç beldergän.
Ul'rix Şteven üzeneñ çığışında bu mäqälä ölkädäge tolerantlıq torışın döres yaqtırta dip taptı.
Şulay itep, Almaniä cirenä stajirovkağa Sverdlovski ölkäsennän Artur Bağas'yan, Larisa Kozlova häm Sergey Nikitin baraçaq. Qalğan qatnaşuçılarnıñ barısına da qatnaşuçı diplomnarı tapşırıldı. Jyuri äğzaları jurnalistlarnı cämğiät öçen möhim bulğan bu temalarnı obyektiv räweştä, döres itep yaqtırtıp torırğa çaqırdılar.
Fäwiä Safiullina, Yekaterinburg .
