Accessibility links

Tömändä uzğan Tuqay bäyräme uquçılar arasında yaña talantlar açtı


“Tuğız awılına äbiem yanına qaytıp yäşämäsäm, Tuqay icatı turında bälki belmägän dä bulır idem”,- di İl'yana. İl'yananıñ änise Salexardta tora. Qızın ul sälämätlege nıq bulsın dip tuğan yağına Wağay rayonına cibärgän. Bez İl'yana belän ul Tuqay räseme yanında fotoğa töşep torğanda tanıştıq. Bu xaqta, möxtäräm tıñlawçılarıbız, aldaraq.

Tömän ölkäse mäğärifen üsterü institutında Tuqaynıñ tuuına 120 yıl tuluğa bağışlanğan festival' ütüe turında söylägän idek. Şağir icatına bağışlanğan däres kürsätep berençe urın alğan Yana At'yal mäktäbe uqıtuçısı Zölfiä Kalgamanova belän dä tanıştıq. Bügen isä süzebez iñ osta şiğer söyläwçe, iñ osta räsem yasawçı, cır başqaruçı mäktäp uquçıları turında.

Guzäl Kasimova başqarğan cır belän Tuqay festivalendä ciñüçelärne büläkläw kiçäse açıldı. Güzäl Tömän şähäreneñ 52 mäktäbendä uqıy. Ul cır bäygesendä ciñüçelär arasında.

Bäygegä törle mäktäplärdän uquçılar barlığı 96 räsem cibärgän idelär. Tuqay icatı buyınça räsem yasawçı ölkän sıynıf uquçıları arasında Tömän rayonınıñ Yambay awılınnan Aydar Xucaxmätovqa tiñnär bulmadı. Ul festival'gä Tuqaynıñ “Par at” häm “Şüräle” äsärläre buyınça räsemnären cibärgän bulğan. Aydar bu bäyge turında “Yañarış” gazetasınnan uqıp beldem di. Räsem mäktäbenä dä yörmi ul öyendä yasıy. Qulına pumalanı keçkenä waqıtta uq alğan. Guaş belän yasarğa yarata. Bıyıl 11 nçe sıynıfnı beterä. Şulay buluğa qaramastan, mäktäpne tämamlağaç, älegä qaya barasımnı belmim di.

İnderäy mäktäbendä 7 sıynıfta uquçı İlsöyar Reçapova “Par at” şiğeren söyläp ciñüçe buldı. Bu anıñ törle bäygelärdä berençe genä uñışı tügel. Ul: “Par at” şiğeren yatlağaç, Qazannı bik küräsem kilä”,- di.

İlsöyärgä Qazannı kürergä nasıyp bulsın dip telik. “İ tuğan tel, i matur tel!” dip atalğan bu festival'dä Qazan yağı qunaqları da bar ide. “Par at” şiğeren söyläp uqıtuçılarnı da, uquçılarnı da, qunaqlarnı da “ah” ittergän uquçı belän tanıştıq. Ul- İlsaf Säübänov. Mondıy bäygelärdä berençe genä qatnaşuı tügel. “Par at” şiğeren söyläp Qazanda Gran-pri da alğan.

Leninogorskiy şähärendäge 11 gimnaziäneñ muzıka citäkçese Färidä Äxmätşina äytüençä, Tömän yağı uqıtuçıları [xezmäte- tırışlıq qına tügel, ä batırlıq. Säğätlär sanı bik az buluğa qaramastan balalar tuğan telne belsen dip bik tırışalar.

Änä Wağay rayonı mäktäplärennän uqıtuçılar bu festival'gä uquçılarnı üz aqçalarına alıp kilgännär. Cibärüçe dä, yul çığımnarın tüläwçe dä bulmağan. Şul isäptän tıñlawçılarıbızğa äytkän äbise belän toruçı İl'yana da. İl'yana bäyge tögällängäç Tuqay räseme yanında fotoğa töşte.

Tuqaynıñ tuuına 120 tuluğa bağışlanğan Tömändä uzğan bäyräm xatiräsen kemnärneñder töşkän fotoräseme, kemnärneñder küñele ozaq saqlar. Tömän ölkäse töbäge mäğärifen üsterü institutında ütkän “İ tuğan tel, i matur tel” dip atalğan bu festival'-bäygene ütkärüne başlap yörgän dotsent, filologiä fännäre kandidatı Saniä Nasibullina äytüençä cäygä xätle cıyıntıq ta basılıp çığaçaq.

Nail Alan, Tömän

XS
SM
MD
LG