Konsertlar Qazan öçen siräk bula torğan küreneş tügel. Ämma yäş cırçı Aygöl Sağınbayıwanıñ konsertı çınnan da waqiğa buldı. Aygöl turında ber tapşıruıbızda söylägän idek, xörmätle tıñlawçılar. Ul waqıtta Başqortstannıñ Uçalı rayonınnan Qazanğa uqırğa kilgän yäş cırçı yaña tanıla başlağan ğına ide. “Tuğan yaq”, ä annarı “Yöräk sere” cırları öçen başqort qızı ike yıl rättän “Tatar cırı” bäygesendä Altın Bars bülägen aldı. Monnan tış ul zur çaralarğa bağışlanğan konsertlarda – Qazannıñ meñellığın bäyräm itkändä 12 ilneñ prezidentı, Rusiäneñ 80 gubernatorı häm prezident Putin aldında cırladı. Ä düşämbedä Aygöl üzeneñ berençe konsertın täqdim itte. Ul anda moñlı tatar xalıq cırların başqardı häm milli kiemdä ber başqort cırın da cırladı. Tatar cırınıñ neçkäleklären, xäzerge zaman ähañnären niçek toyasın sin digän sorawğa anıñ cawabı mondıy buldı:
Keçkenädän ike äbiem dä mine başqort cırlarına öyrätte. Qazanğa kilgänçe min tatar telendä söyläşä dä belmi idem. Uqıtuçım, tanılğan cırçı Rimma İbrahimova mine tatar cırınıñ neçkäleklärеnä töşenderde, moñlı tatar cırların başqarırğa öyrätte.Yäş cırçı Aygöl Sağınbayıwa buldı. Aygöl äle student qız. Ul Qazan mädäniät häm sänğät Akademiäsendä uqı. Ämma anıñ konsertı bik osta, professionallarça äzerlängän ide. Bik yäş buluına qaramastan Aygölneñ säxnädä üzen totışı, anıñ kömeşle tawışı küplärne cırçınıñ icatına ğaşıyk itte.
Konsertta şulay uq Başqortstannan kilgän yäş cırçılar İl'dar Zaripov häm İl'far Fäyzullin dä qatnaştı. Kiçädä cırçılardan tış Qazan biyu ansamble, Qazan “Nur” ansamble çığış yasadı. Kiçägä xalıq küpläp kilde häm bik tä qänäğät qaldı. Aygöl tatarnıñ böyek cırçıları Sara Sadıyqova, Älfiä Afzalovalarnıñ layıqlı däwamçısı dip tanıdılar. Läkin gel moñsu cırlar başqara dip äytüçelär dä buldı.
Aygöl isä Ural tawları üzägendä tuğan başqort qızı bulıp ta, tatar cırınıñ serlären, anıñ maturlığın añlıy. Ul üz uqıtuçılarına, xıyalın tormışqa aşıruçı barlıq yärdäm itüçelärgä dä räxmätlären belderde. Ğädättä, Başqortstannıñ tatar cırçıları Qazanğa kilep yul aça, ä Aygöl - başqort qızı Qazanda tanıla.
Al'bina Zäynulla
