Soñğı yıllarda respublikadağı qayber tatar awılları tormışında yaña yolalar tamır cäyde. İnde ike distä yıl artıq Şığırdan awılında irekle köräş buyınça Dönya kubogı iäse Minsäyet Tacetdinov büläklären alu öçen region ara köräş turnirları ütkärelep kilä. 18 yıl buyı Urmay awılına da Böten Rossiä tösen alğan tatar estrada cırı “Urmay moñı” festivale uzdırıla. Şığırdan awılında şulay uq Ramazan ayı tämamlanu belän Respublika küläm cır festivale ütkärü yolağa kerde. Kozlovka rayonınıñ Qarmış awılında yıl sayın Çişmä bäyräme tirän eçtälekle itep ütkärelä. Bu awılğa bäyrämgä tirä yaq awıllardan, Qazannan qunaqlar küp itep qaytalar. Batır rayonı Qızıl Çişmä awılında xezmättä, cämäğät tormışında dan qazanğan awıldaşları xörmätenä inde biş yıl buyı sport festival’läre matur itep uzdırıla. Bu turıda täfsilläbräk söylärgä buldım. Çönki, bu çara kübräk sport bäyrämenä äwerelep, bik küp sport söyüçelärne cıya. Soñğı tapqır zur şundıy festival' siksän yäşen tutırğan Ğibadulla ulı Soltan ağa Ğäynullin xörmätenä ütkän ide. Soltan abıy Watan suğışı vetiranı, ğömereneñ küp öleşen mäğärif eşenä bağışlağan şäxes, şuşı Çişmä mäktäbendä uqıtuçı, Tatar Soğıtında mödir bulıp uñış yawlıy, annan soñ rayon mäğärif bülegen küp yıllar citäkli, rayon başqarma komitetı räise urınbasarı wazifaların unber yıl buyı başqara. Cämäğät eşlärendä dä aktiv qatnaşa. Sport belän mawığa. Rayon mäğärif bülegen citäklägän çorda, uqıtu-tärbiä eşlärendä ireşkän uñışları öçen, bülekkä Rossiäneñ Küçmä qızıl bayrağı ike yıl rättän tapşırıla. Üze Maqtaw bilgese ordenı belän büläklänä.
Berençe bulıp şaşka-şaxmat festivale ğömere buyı awıl mäktäbendä balalar uqıtqan suğış vetiranı İvanov Konstantin abıy istälegenä uzdırıla. Anı awılda härkem ixtiram itte, çönki ul kürşe awıldan yörep, torışıp balalar uqıttı, mäktäptä, awılda fizkul'tura –sport üseşenä zur öleş kertkän uqıtuçı ide. Ul osta şaşka-şaxmatçı, voleybol, futbol başqa tör sport uyınnarın başlap cibärüçe buldı.
Annan soñ şundıy çaralar uqıtuçı, sportçılar bulğan Abderauf Nasretdinov häm Şäwkät abıy Söläymanov istäleklärenä ütkän ide. Alar osta sportçı buldılar, rayon, respublika külämendäge yarışlarda küp tapqırlar qatnaşqan, şaşka-şaxmat uyınnarı ostaları ide. Şuşı sport festival’lären xäzerläp ütkärüne üz wazifası itep sanawçı Mansur Zarif ulı Abdullin xörmätenä dä 70 yıl yubiley uñayınnan sport festivale uzdırıldı. Ğädättägeçä, festival' awıldan ğına tügel, tirä yaqtan sport söyüçelärne cıya. Rayon xakimiätennän kilälär. Qazannan qunaqlar büläklär belän qaytalar. Çara mädäniät yortında, yä bulmasa öç qatlı mäktäp binasında ütä. Yubilyarlarğa bağışlanıp stena gazetaları da çığarıla, alar turında şulay uq yazmalar respublika tatarlarınıñ Waqıt gazetasında häm rayon gazetası Avangardta basıla. Yubilyar turındağı çığışlardan soñ, şaşka häm şaxmat buyınça yarışlar başlana. Alarda qırıq-illeläp sport söyüçelär qatnaşa. İğänäçelär yärdämendä xäzerlängän istälekle büläklär härber sportçığa tapşırıla. Alar tämle çäydän soñ, öylärenä taralışa.
Xäzerge waqıtta tağın ber zur çara ütkärergä xäzerlänälär. Ul 100 yäşen tutırıp kilgän Bäyän äbi İdeyätullinağa bağışlanaçaq.
Säyfi Safiullin, Çuaşstan
