Comğa könne Ufadağı “İxlas” mäçetendä “İslam häm xäzerge zaman” digän temağa zur cıyın üz eşen başladı. Mondıy cıyınnar “İxlas” mäçetendä äledän-äle bulıp tora häm anda Rusiäneñ törle töbäklärennän kiñ bilgele imamnar, xäzrätlär çaqırıla. Qunaqlar andıy kiñäşmälärdä, ğädättä, xalıq aldında wäğäz belän dä çığış yasıy. Bu yulı älege zur cıyınğa bilgele ruxani, Qazannıñ Qol Şärif mäçete imam-xatibı Ramil xäzrät Yunıysov çaqırıldı.
Comğa könne töş waqıtında Ramil xäzrät öylä namazında häm başqa ğibädätlär qıluda qatnaştı. Annan soñ “İxlas” mäçetendäge tamaşalar zalında “İslam häm xäzerge zaman” konferensiäseneñ ikençe öleşe başlandı. Anda tirän eçtäşlekle wäğäz belän Ramil xäzrät Yunıysov çığış yasadı. Biregä kilgän mö’min möselmannar Qazan qunağın tın da almıy tıñladı. Anıñ çığışı öçen zur räxmätlären äytkän “İxlas” mäçete imam-xatibı Möxämmät xäzrät Ğalläm bilgeläwençä, Qol Şärif mäçete imam-xatibınıñ wäğäze başqa küp kenä imamnarğa ürnäk bula ala.
Ramil xäzrät Yunıysov ta wäğäz söyläw ostalığın imamnarnıñ iñ köçle qoralı dip isäpli.
- Barı tik ğilemle häm kiñ qaraşlı ruxanilar ğına wäğäzne mäğnäle häm qızıqlı itep söyli ala. Şulay bulğanda ğına xalıqnı üz süzläreñneñ xaqlığına ışandıra häm inandıra alasıñ, - dip isäpli Ramil xäzrät.
Ramil Yunıs – İmamnar ğilemle bulırğa tieş. Şul çaqta ğına alar başqa keşelärne ışandıru köçenä iä bulaçaq. Bez dini uqu yortlarında din däresläre genä birmibez, ä dönyawi fännär dä uqıtabız.Qazannıñ Qol Şärif mäçete imam-xatibı Ramil xäzrät Yunıysov buldı. Ul Ufadağı “İxlas” mäçetendä başlanğan “İslam häm xäzerge zaman” dip atalğan cıyında qatnaşu öçen kilde. Anıñ Ufağa säfäre şimbä könne dä däwam itäçäk. “İxlas” mäçetendä din belän qızıqsınuçılar häm jurnalistlar öçen Ramil xäzrät Yunıysov ayırım oçraşu da ütkäräçäk häm alarnıñ küp sanlı sorawlarına cawaplar biräçäk.
Fänis Fätxi, Ufa
