Accessibility links

Кайнар хәбәр

27 iyün - yäşlär köne


Sişämbedä respublika yäşlären Qazan merı İlsur Metşin qotladı. Üz qotlawında mer - Qazan xalqınıñ 40%tın yäşlär täşkil itä, şuña kürä meñellıq tarixı buluğa qaramastan, Qazan yäşlär qalası bulıp qala dide. Yıl sayın respublikada yäşlär bäyrämen yäşlär häm sport eşläre ministrlığı ütkärep kilgän. Bıyıl älege bäyräm Qazan meriäse häm respublika studentları Ligası tarafınnan oyıştırılğan.

Töp çara şähärneñ Maksim Gor'ki isemendäge Mädäniät häm yal itü parkında ütte. Bäyräm 11säğättä kükkä hawa şarın oçırudan başlanıp kitte. Bäyrämdä törle sport häm mädäni çaralar ütkärelde. Anda respublikanıñ iñ aktiv yäşläre, Rusiä estrada yoldızları çığış yasadı. Üzäk mäydanda mini-futbol komandaları yarıştı, ekstrimal' sport törläre buyınça da çığışlar buldı. Ä töştän soñ “Xäräkät” rok konsertı, Qazannıñ “Studentlar yazı 2006” festivale lawreatları, dürt tatar KVN komandası häm Rusiä estradası yoldızı - Otpetıye moşenniki” törkeme yäşlärneñ küñelen açtı. Bu könne Qazan meriäse yäşlär öçen tağın ber büläk äzerlägän ide. Gor'ki parkında uzğan çaralarğa kilgän, 30 yäşe tulmağan yäşlärgä tönge klublarğa biletlar taratıldı. Yäşlär könendä älege klublar buşlay eşläde.

Küñel açu ul älbättä yaxşı, ämma yäşlär öçen bu ğına citäme? Yäşlär tormışında problemalar şaqtıy küp. Uqırğa kerü diseñme, eş tabu, aqça mäs’äläse, toraq häm başqalar. Yäşlär bu xaqta üzläre dä açıqtan-açıq äytä:

- Min tizdän yuğarı uqu yortın tämamlıym. Şuña kürä dä minem alda torğan iñ zur mäs'älä ul üz hönärem buyınça eşkä urnaşu. Şul uq waqıtta diplomnı da äybät kenä yaqlarğa kiräk miña. İñ möhime tormışta - üzeñne tabu!

- Min Qazan däwlät universitetı studentı. Student bulğaç bilgele inde - mine sessiä, imtixannar birü mäs’äläse bik borçıy! Monnan tış şunı telär idem - fakul'tet tormışında aktiv qatnaşqan yäşlärgä stipendiäne artırsınnar ide.

- Aqça, uqu problemaları bar bezneñ. Stipendiälär bik keçkenä inde. Älbättä, eşlibez. Şuña kürä dä yäşärlek aqçabız bar.

Bügenge köndä üz üzeñne tabu häm normal', yaxşı şartlarda yäşäw yäş keşe öçen şaqtıy qatlawlı mäs'älä. Şuña kürä dä alar yärdämgä, iğtibarğa moxtac.

Al'bina Zäynulla

XS
SM
MD
LG