Accessibility links

Кайнар хәбәр

Tufan Miñnullin: maqsat - yäşläreneñ tatar telen belüe


Şuşı könnärdä genä Tatarstan Däwlät Şurasında ber qızıqlı wä bik möhim oçraşu bulıp ütte. “Mäğärif” ilküläm proyektınıñ tormışqa aşuın küzätüçe komissiäneñ utırışı ide ul. Anda küp kenä sorawlar qaraldı, läkin töp mäs'älä ikäw ide - Tatarstannan çittä yäşäwçe millättäşlärebezneñ respublika vuzlarında uqu mömkinleklären tikşerü häm Tatarstan, Rusiäneñ başqa töbäklären däresleklär, uqıtu metodik äsbäplär belän tä'min itü. Utırışta “Mäğärif” ilküläm proyektınıñ Tatarstanda tormışqa aşuın küzätüçe komissiä räise Räzil Väliev, älege komissiäneñ äğzälärı, ministrlar kabinetı wäkilläre, deputatlar, Bötendönya tatar kongressı wäkilläre, uqu yortları rektorları, ğalimnär qatnaştı.

Alar çittä yäşäwçe millättäşlärebezne Tatarstanda uqıtu mäs’äläläre xaqında fiker alıştı. Ä bu ölkädä çişeläse mäs'älälär küp. Alarnıñ şaqtıyı finanslaw belän bäyle. Bötendönya tatar kongressı citäkçese Rinat Zakirov çittä yäşäwçe millättäşlärebezgä birelä torğan kvotalar xaqında söyläde. Anıñ äytüençä, älege kvotalar belän respublika vuzlarına kerüçe tatar balalarınıñ sanı yıl sayın arta

Akademik İndus Tahirov isä bezdä sälätle tatar yäşlären tabu häm alarnı uqırğa kertü mexanizmı ğomumän yuq dip belderde. Ul sälätle millättäşlärebezne tabu öçen töbäklärdä yäşäwçe tatar balaların respublika olimpiadalarında qatnaştırıp, alarnı kvota buyınça uqırğa kertü isemlegenä kertergä kiräk dide.

Deputat Tufan Miñnullin üz çığışında kvotalar belän uqırğa kerergä yärdäm itüneñ çın asılın onıtıp cibärmäskä kiñäş itte.

Cıyılışta Tatarstan häm Rusiäneñ başqa töbäklären däresleklär, uqıtu metodik äsbäplär belän tä'min itü mäs’äläläre dä tikşerelde. Ser tügel, küp kenä töbäklärdä, şul isäptä Tatarstannıñ üzendä dä tatarça däresleklär citmi. Ministrlıq wäkilläre däresleklärneñ citmäwendä töbäklär üzläre ğayıple, kitap kiräk dip waqıtında ğariza yazmağannar dide. Ämma eş şunda - bıyıl respublika mäğärif ministrlığına byudjettan birelergä tieşle aqçanıñ nibarı 34%tı ğına tapşırılğan. Näticädä “Mäğärif” näşriäte uzğan yılnıñ oktäber ayınnan birle däwlättän aqça alğanı yuq. Bu isä - tatar telendäge däresleklärgä qıtlıq tudırğan. Ägär dä Mäğärif ministrlığı yäki näşriät üze aqça problemasın waqıtında - Däwlät Şurası sessiäse aldınnan kütärsä, tatar balaları kitapsız qalmas ide.

Al'bina Zäynulla

XS
SM
MD
LG