Ğabdulla Tuqaynıñ änie Bibimämdümä abıstay Baltaç rayonınıñ Sosna Püçinkäse awılı ziratında kümelgän. 1980 yıllarğa qädär şağir äniseneñ qäbere belän älläni qızıqsınular bulmadı, barı tik şuşı yıllarda ğına, Mämdümä abıstay kümelgän dip farazlanğan qäbergä taş quyalar. Şulay itep, monnan 20 yıllar çaması elek Mämdümä qäberenä quyılğan taş yañartıldı, säbäbe nidä? Bu xaqta Tuqay isemendäge kümäk xucalıq räise Nurulla Säg''diev bolay di :
Berençe qäber taşın Qazannan alıp qaytqanda urtalay sınğan ide. İkençedän bu taş bezneñ zamanğa turı da kilmi ide inde.
Tuqay äniseneñ qäber taşın yañartu tantanasında deputat yazuçılar Tufan Miñnullin, Razil Väliev, şağir Gäräy Räxim, Ğarifcan Möxämmätşin, Tatarstan jurnalistları berlege räise Rimma Ratnikova h.b qatnaştı. Tuqay bulğan cirlärdä yazuçı - dramaturg nindi xislär kiçergän. Tufan Miñnullin :
Tuqay, küptän inde şağirlektän uzıp, millätneñ zatlı balasına, ölgesenä äylängän şäxes. Bez bügen Tuqay häm anıñ änise yanına qayttıq. Bibimämdümä qäbere yanında basıp torğanda dönya, Tuqay turında uyladıq. Xalıqnıñ küp buluı söyenderde. Dimäk, xäter yäşi.
Şulay itep, 2006 yılnıñ 12 iyülendä Tuqay üze, anıñ änise Bibimämdümä Sasna Püçinkäse cirendä iskä alındı.
Ğafiulla Ğaziz, Çallı
