Amerika Quşma Ştatlarınıñ Rusiäneñ Yekaterinburg şähärendäge General' konsulı Djon Stepançuk citäkçelegendäge wäkillekneñ çärşämbe könne Başqortstanğa eş säfärenä kilüe xaqında xäbär itkän idek inde. Amerika General' konsulınıñ Ufağa çirattağı kilüe, nigezdä, gumanitar mäs'älälär buyınça söyläşülär ütkärü häm berniçä urında oçraşularda bulu maqsatın küz uñında tottı.
Djon Stepançuk äfände Ufadağı 136 nçı sanlı Başqort litseenda eşläp kilüçe çit tellär öyränügä maxsuslaşqan, profil'le xalıqara cäyge lager'da buldı. Anda ul uqıtu barışı belän yaqınnan tanıştı. Älege uqu yortında balalar ingliz telen tiränten öyränä. Alar Amerika Quşma Ştatlarıyndağı yäştäşläre belän internet çeltäre aşa daimi aralaşıp yäşi. Djon Stepançuk 136 nçı sanlı Başqort litseenda oçraşu waqıtında ingliz telen öyränüçe uquçılarnıñ cäyge lagere tormışı belän centekle qızıqsındı. Bu lager'da balalar öçen ingliz telen häm Amerika mädäniäten öyränüneñ maxsus programmaları buldırılğan. Andıy proyektlarğa AQŞnıñ Rusiädäge ilçelege häm Yekaterinburgtağı konsullığı matdi yärdäm dä kürsätep tora.
Bıyılğı cäyge lager'nı oyıştıruğa “Makdonal'ds”. Rossiä” kompaniäse, şulay uq “Lido” aşxanälär çeltäre belän töreklärneñ “Mado” tuqlandıru üzäkläre dä üzläreneñ matdi yärdämen bülde.
Atnakiç könne Ufağa säfäre barışında Djon Stepançuk äfändene “telçe skautlar” dip isemlängän oyışmağa äğza itep aldılar. Moña ul Başqortstanda xalıqara mäğärif proyektlarına härdaim yärdäm itep kilgäne öçen layıq buldı.
Amerikanıñ Yekaterinburgtağı General' konsulınıñ Ufağa säfäre başqalanıñ yaña tözeleşlären qaraw häm istälekle urınnar belän tanışuğa da bay buldı. Soñınnan ul jurnalistlar öçen matbuğat oçraşuı da oyıştırdı häm küp sanlı sorawlarğa cawaplar birde.
