Başqortstan tatar milli oyışmalarınıñ 15 yüldä Ufada berlektäge kiñäytelgän kiñäşmäsen ütkäräçäge xaqında xäbär itkän idek inde. Anda töp söyläşü Başqortstanda tatar mäğärifen saqlap qalu mäs’äläläre tiräsendä bulaçaq ide. Ämma bu cıyınnı 29 yülgä qädär kiçekterergä buldılar. Anıñ säbäbe xaqında Başqortstan Tatar milli-mädäni moxtariäte räise urınbasarı Mäcit Xucin bügen Ufada tatar oyışmaları wäkilläre qatnaşlığında ütkän utırışta äytte. “Bez Başqortstanda tatar mäğärifen saqlap qalu mäsälälärenä bağışlanğan cıyınğa Mäskäwdän dä küp kenä tanılğan keşelärne, federal' oyımalar häm ministrlıqlarnıñ cawaplı citäkçelären çaqırğan idek, - di Mäcit äfände. – Ämma baytaq qına çaqırıluçılar üzläreneñ Ufağa iyül azağında ğına kilä alaçağın xäbär itte. Şuña kürä dä kiçekterergä kileşende bu möhim cıyınnı”.
Xucin – Bez Mäskäwdän wäkillär çaqırdıq. Rusiä Prezidentı qarşındağı Sovetnıñ, Ella Pamfilova xanımnıñ wäkillären, annan Rusiä Mäğärif ministrlığı häm başqa citäkçelärne çaqırdıq. Ä alarnıñ qayberläre Ufağa iyül azağında ğına kilä aluların xäbär itte. Äle cıyınğa äzerlek däwam itä. Dokladlar, çığışlar äzerlänä.
Başqortstan Tatar milli-mädäni moxtariäte räise urınbasarı Mäcit Xucin fikerlären işettegez. Ul alda torğan cıyınnıñ zur ähämiätkä iä ikänlegen assızıqladı. Bu uqu yılınnan Başqortstanda här millät balası mäktäplärdä berençe sıynıftan başlap 11нче sıynıfqaça başqort telen mäcbüri öyränergä tieş bulaçaq. Monı respublika Mäğärif ministrlığı üzeneñ bıltır noyäber ayında qabul itkän qararı belän räsmi nığıtıp quyğan ide.
Başqortstan tatar cämäğätçelege mäktäplärdä başqortça uqıtunı här millät balasına şart itep quyunı bigräk tä tatar mäğärifenä zur qurqınıç tudıraçaq, dip isäpli. “2002 yılda xalıq isäben alu barışında küp kenä tatar awıllarında yäşäwçe tatarlar “başqort” dip yazdırıldı, - di alar. – Şunıñ arqasında saf tatar awıllarındağı xalıqnıñ 60-80 protsentı çaması xäzer başqort bulıp isäplänä. Tabiği inde, şul sannarğa qarap, Başqortstan xakimiätläre ul awıllardağı saf tatar mäktäplären başqortlaştıru eşenä küçärgä mömkin. Yänäse, andağı xalıqnıñ küpçelege başqort ikän, dimäk alar üz ana tellärendä belem alırğa xaqlı”.
Başqortstan Tatar ictimaği üzäge räise Ayrat Ğiniätullin süzlärençä, başqort telen mäcbüri uqıta başlaw tatarlarnı ğına tügel, ä Başqortstanda yäşäwçe başqa millätlär wäkillären dä borçıy. Şuña kürä dä bu cıyında respublikadağı başqa berniçä xalıqnıñ milli oyışmaları wäkilläre dä qatnaşaçaq, di ul.
29 yüldä Ufada ütäçäk cıyında Başqortstan tatar milli xäräkätenä qarağan baytaq oyışmalar wäkilläre, törle rayonnardan häm Ufanıñ üzennän cämğısı 300 läp keşe qatnaşaçaq. Anda “Başqortstan tatar mäğärifeneñ bügenge xäle häm kiläçäge” digän temağa töp doklad belän BR Tatar ictimaği üzäge räise Ayrat Ğiniätullin çığış yasayaçaq. Doklad buyınça fiker alışularda Mäskäwdän kilgän qunaqlar da qatnaşaçaq, dip kötelä
