Başqortstandağı yäş tatar cırçıları arasında yaqtı yoldızğa äwerelgän İlham Väliev bügenge köndä üzeneñ ayırım konsert programmasın äzerli. Bu xaqta ul comğa könne jurnalistlar belän oçraşuında xäbär itte. Talantlı cırçı bügen Başqortstan däwlät opera häm balet teatrında solist bulıp eşläsä dä, tatar xalıq cırların bik osta başqaruçı cırçı bularaq tanıldı. Bıyılğı yaña icat mizgelendä täqdim itäçäk yaña konsert programmasında da tatar xalıq cırlarına zur urın biräçägen belderde ul. Tatar xalıq cırlarına söyüneñ mäşhür cırçılar İlham Şakirovnı, Xäydär Bigiçewnı tıñlawlar näticäsendä tuuı xaqında äytä İlham Väliev. “Keçkenädän ük bezneñ öydä alarnıñ cır tälinkäläre yañğıradı. Üzem dä keçkenädän ük garmunda uynap cırlıy idem”, - di yäş tatar cırçısı.
Ufadağı talantlı tatar cırçısı İlham Väliev buldı bu. Üzeneñ yaña konsert programmasın äzerläwe xaqında äytep, anı yaña icat sezonı başlanğaç tamaşaçılarğa täqdim itäçägen dä citkerde ul.
İlham Väliev Çaqmağış rayonınıñ İmänlekül digän tatar awılında tuıp üsä. Sälätle malay keçkenädän ük cırlarğa mahir bula. Şuña da mäktäpne tämamlawğa uq, Ufa däwlät sänğät institutına uqırğa kerä ul häm anı uñışlı betergäç, şunda uq Başqortstan däwlät opera häm balet teatrına solist itep eşkä çaqırıla.
Operalardan ariälärne yuğarı ostalıqta başqaru belän bergä, İlham Väliev tatar xalıq cırların häm kompozitorlar äsärlären dä cırlarğa yarata. “Sibelä çäçem”, “Güzälem”, “Kün awılı köe”, “Ädrän diñgez”, “Siña kildem, irkäm”, “Yäşlek” kebek matur cırları belän xalıqnıñ söyüen ayuladı ul.
Fänis Fätxi, Ufa
