18 sentäber könne Qazan şähäre idäräçeläre kiñäşmäsendä şähär merı İlsur Metşin Rusiä wäkillegeneñ Turin şähärenä räsmi säfärenä näticälär yasadı. İnde xäbär itüebezçä, şuşı könnärdä İtaliäneñ Turin şähärendä 2007 yılda uzaçaq studentlarnıñ qışqı universiadasın täqdim itü çaraları ütte. Älege çaralarda Rusiä delegatsiäse sostavında Tatarstan wäkilläre dä qatnaşqan ide. Bilgele bulğança, Qazan şähäre 2011 yılda studentlarnıñ cäyge universiadasın qabul itügä ğariza tapşırğan ide. Qazanlılar Turinda üzen barı tik yaxşı yaqtan ğına kürsätkän. 24 oktäberdä Qazanğa Xalıqara studentlar sportı assotsiatsiä wäkilläre kilüe kötelä. Komissiä äğzalarına qarar qabul itkänçe ğadi keşeläreñ fikeren dä belüe ixtimal. Alar metroğa kerep, xalıqnıñ Universiada ütkärügä mönäsäbätlären sorıy ala. Universiada - Olimpiada kebek sport yarışınnan soñ ikençe zur çara. 2011 yılda Universiada Qazanda uzsa, şähär üzeneñ üseşendä yaña basqıçqa kütäreläçäk", - di İlsur Metşin. 2011 yılğa qädär Qazanda sportnıñ su törläre öçen saray häm köräş sarayın açarğa kiräk. Şulay uq Universiadada qatnaşuçılar öçen 10 meñ urınğa isäplängän Olimpiä awılın torğızırğa kiräk. Dönya däräcäsenä turı kilüçe Boz sarayı häm “Basket-xoll” şähärdä bar inde.
