Accessibility links

Кайнар хәбәр

Samarnıñ “Yalqınlı yäşlek” ansamble kürşelärgä bardı


“Yalqınlı yäşlek” ansamble daimi köpçäk östendä. Samar ölkäsendäge tatar awılları belän genä çiklänmiçä kollektiv kürşe ölkälärgä dä barıp qaytırğa cayın taba. Alar äle genä Ul''yan ölkäseneñ Nikolaevka awılında häm Penza ölkäseneñ Kuznetsk şähärlärendä berençe közge konsertların birep qayttılar. Şul säyäxät turında ansambl'' citäkçese İlgiz Kälüç belän söyläşäbez:

İlgiz äfände, kemnär aşa yaña töbäkkä yul tottığız?

Nikolaevka – rayon üzäge. Bu rayonda öç tatar awılı bar. Biş mäscede görläp eşläp yatuçı ataqlı Çirkli, Sayman häm Äxmätle awılları. Tatar awılları ölkä üzägennän 300 çaqrımğa urnaşqannar, Qazannan 500 çaqrım. Bu yaqlarğa Qazan yağınnan sänğät köçläre kilmi dip äytälär. Bezneñ konsertlarnı şuşı yaqnıñ kürenekle eşquarı, xalıq deputatı Ümär Abulatov digän milli canlı tatar oyıştırdı. Ul awıllardan xalıqnı rayon üzägenä avtobuslarda kiterde. Bezneñ moñnarnı, cırlarnı, şiğerlärne xalıq tansıqlap qabul itte. İkençe könne Penza ölkäsenä küçep Kuznetsk şähärendä konsert kürsättek. Andağı konsertqa da tatar awıllarınnan kilgännär ide. Bu yaqtağı tamaşaçılar arasında kübräk xatın- qızlar. İrlär bik az. Xatın- qızlar yaratıp basıp qul çaptılar. Menä şulay közge sezonnı kütärenke küñel belän açıp cibäräbez.

Konsertlarğa irlär yörmäwne ni belän añlatıp bula?

Xatın- qızlar sänğätebezne totuçı, ana telen saqlawçı. Maturlıqqa kübräk xatın- qızlar omtıla. İrlärne dönya mäşäqäte basqandır. Küz aldıña kiter, böten Rossiä buylap görläp barğan Sabantuylar Kuznetskiğa bıltır ğına kilep citkän. Şunnan añlap bula inde xällären. Nikolaevka awılına Salawat kilgän bulğan. Bilet satılmağan. Läkin dä monda ikençe säbäp tä bar bit. Salawatnıñ bilet xaqları yuğarı, ä awıllarda matdi xällär möşkelräk.

Samarnıñ üzendä qayçan sezon açarğa isäp?

Ğinwar ayında isäp.

Nindiräk programma bulır inde?

Cide yözençe konsert. Här yözençe programmanıñ üz yöze bula. Yaña cırçılar, yaña biyuçelär, yaña şiğer söyläwçelär kilde. Ğomumän yañalıqlar küp bulaçaq.

Tatar ğailäsen işäytüçelär

Samarda yäşlär öçen diskotekalarnı ike cirdä ütkärep kilälär. Şul ikeneñ berse – Radik Ğäzizov. Nihayät, kättä baylar ğına yal itä torğan “MTL- Arena” binasına tatar yegetläre- qızları da cıyıla başladılar. “Tatar töne” isemle tamaşalar yıldan- yıl ofığın kiñäytä. Yegetlärebez “Tatar töne” programması belän Tol''yatti şähärenä barıp qayttılar. Törkem citäkçese Radik Ğazizov belän äñgämä totabız:

Radik, ataqlı Avtovaz şähärendä berençe märtäbä diskoteka uzdırdıñ. Niçegräk ütte?

Xalıq küp cıyıldı. Programmabız yäşlärgä oşadı. Qazannan Emil Ayzatulla törkeme, Samardan “Yalqınlı yäşlek” artistları qatnaştı. Güzäl Fäxretdinovanı yäşlär bik yarattılar. Biyuçelär dä xalıq küñelenä xuş kilde.

Programmada tatar muzıkası niçä protsent täşkil itte?

Kiçke säğät unda başlanğan küñel açu çarası irtänge säğät bişkä qädär däwam itte. Muzıkal'' programmanıñ citmeş protsentı tatarça ide. Öç- dürt di-dcey kiçäne härberse üzençä bizäde.

Yäşlär aynıq kileş bii alalarmı?

Min üzem isereklärne kürmädem. Räxätlänep biedelär, uyınnarda qatnaştılar.

Tol''yatti milli- mädäni möxtäriäte citäkçeläre kilgännär ideme tamaşa qararğa?

Unğa yaqın keşe kilde. Alarğa süz birdek. Bik qızıqsınıp küzätep tordılar. Kiçädän qänäğät qaldılar.

Radik, sin üzeñneñ törkemeñ belän Samarda dan qazandıñ, Tol''yatti yäşlären mökibbän itteñ. Kiläçäktä qaysı şähärne yaulap alu niäte tora?

Planda - Ul''yan. Anda tatarlar küp. Ä yäşlär öçen bezneñ bieklektä kiçälär oyıştıru yuq älegä. Annarı tağın ber matur küreneş küzgä taşlana. Samar diskotekasına Tol''yatti yäşläre kilä. Tol''yatti diskotekasına Samaradan bardılar. Yegetlär üzläreneñ mäxäbbätlären ezlilär. Şul uq yäşlär Ul''yanğa da barabız dip toralar.

Yäşlär öçen uzdırılğan yal kiçäläreneñ töp maqsatı nidän ğibärät?

Tatar ğailäsen ürçetü, tatarnı işäytü.

Şamil Bahautdin, Samar

XS
SM
MD
LG