Yätim tatar balaları öçen yort bar ide inde Qazanda. Mäçet, mädräsälär tözätkän tatar millionerları Yunısovlar tota ide ul yortnı. Ämma revolyutsiä, xakimiättäge kommunistlar tatar bayların da mileklärennän mäxrüm itä. Şul yıllarda Yunısovlar totqan yätimnär yortı da beterelä.
Monnan soñ maxsus tatar balaları öçen yätimnär yortı tözelmäde. Soñğı berniçä yılda milli cämäğätçelek yänä bu mäs’äläne kütärde. Ata-ana nazın kürmägän sabıylarğa inde yort ta birelgän ide. Ämma ni säbäptänder bu eş tuqtatıldı. Häm bala yortı açılmadı.
Xäzer Yunısovlar da, Apanayıwlar da yuq. Yätim tatar balasın kem yaqlar? Düşämbe könne xäyriä eşlärenä bağışlanğan Qazandağı forumda älege xaqta da süz çıqtı. Milli balalar yortın tözü kiräklege turında forumda Tatarstannıñ “Möslim”berlege citäkçese Nailä Cihanşina çığış yasağan. “Azatlıq” radiosına Nailä xanım bolay dide:
Oyışma wäkilläre belän yätimnär yortlarına yış qına barabız. Xäyriä aksiäläre uzdırabız. Balalar sağınıp kötep ala bezne. Bez şundıy küñelsez küreneşkä tap bulabız. Ul yortlardağı tatar balaları urısqa äylänä. Bu xälne tuqtatuı qıyın, şulay da bulıdaır. Monıñ öçen milli balalar yortın tözergä kiräk. Alarğa tuğan tel, ğöref-ğadätlärne señderü bezneñ burıçıbız.Forumda Nailä Cihanşinanıñ bu täqdime uñay qabul itelgän. Anda milli balalar yortın tözü turındağı rezolyutsiä dä qabul itelgän. “Möslimä”berlege citäkçese Nailä Cihanşina bu täqdimneñ tormışqa aşu mömkinlekläre zur dip sanıy. Ul üzeneñ älege ışanıçın respublika Xäyriä Şurasın Tatarstan prezidentı M.Şäymiewneñ citäkläwe belän añlattı. Şulay da älege izgelekne eşlärgä aşqınıp toruçılar kürenmäde forumda. Häm dä milli balalar yortınıñ qayçan tözeläçäge dä älegä bilgesez qala.
Al'bina Zäynulla
