Rusiä prezidentı belän mondıy turı elemtälär bişençe tapqır ütkärelä häm Çallılar berençe tapqır Vladimir Putinğa televidenie aşa soraw birü mömkinlege aldı. Çallı- Mäskäw televizion küpere ni räweşle oyıştırılğan ide soñ? "Rossiä" telekanalınıñ eş törkeme ber kön aldan kilgän ide. Alar küp sanlı cihaz- texnikaların şähärdän 4-5 çaqrım yıraqlıqta bulğan avtomobil' zavodı yanına urnaştırdılar. Şuşı uq ör- yaña KamAZ maşinaların çığarıp tezdelär. Sişämbe könne, kiçke yaqta Çallı- Mäskäw televizion elemtäsenä sınaw ütkärelde. Vladimir Putinğa soraw birü niçek oyıştırılğan? Älbättä, xalıqnıñ küpçelege, sorawlar häm anı birüçelär aldan uq bilgelängän,- digän fikerdä tordı. Cirle jurnalistlar şuşı fikerne "Rossiä" telekanalınıñ töşerü törkemenä dä citkergän ide, Mäskäw jurnalistları üz çiratlarında, aldan bilgelängän sorawlar bulmayaçaq, digän belderü dä yasadılar. İnde, Çallı- Mäskäw televizion küperendä bulğan söyläşügä yaqınraq kilik. 200гә yaqın cıyılğan keşeneñ küpçelege kamazlılar ide. Tora bara alarğa şähärdän avtobuslar belän alıp kilgän uqıtuçılar, tabiplar östälde. Vladimir Putinğa soraw birergä telägän härkem älege mäydançıqqa kerä almıy ide. Tirä- yaqta 3 metr bieklektäge zavod qoymaları, kerü urınında şulay uq zavod qarawılı häm militsiä. Oyışıp kilgän törkemnär genä soraw birü urınına qarşılıqsız ütä aldı. Azatlıq xäbärçesen, başqa yalğız kilüçelärne 3-4әр qat tikşerep ütkärdelär. Çallıdan birelgän sorawlarnı iskä töşerep tormıym. Şunısına tuqtalam, cıyılğan xalıq arasında sorawnı min, min biräm digän bäxäslär bulmadı. Xätta, Mäskäw öçençe sorawğa röxsät birgäç, korrespondent berqädär yuğalıp qaldı, kem soraw birergä teli digäç, berniçä sekundqa tınlıq urnaştı, beräw dä "Sorawım bar," dip sikerep çıqmadı. Andıy mömkinlek bar ide. Şunıñ belän Çallığa qağılışlı turı elemtä tämam buldı, cirle jurnalistlar soraw birüçe Ğari Kobusaniäne, Alsu Sabitovnı, turı elemtäne alıp barğan Mäskäw jurnalistı İl'ya Kanafinnı soraştıra başlıylar. Abxaz yegete Ğari Kobusaniä Putinnıñ bügenge Abxaziägä qağılışlı cawaptan tulısınça qänäğät tügel:
"Abxaziäneñ möstäqillege xaqında ber süz dä äytmäde" di ul.
Ä menä İl'ya Kanafinğa haman ber soraw belän möräcäğät itälär:
-Sorawlar aldan oyıştırılğan ideme, yuqmı? Mäskäw yegete mondıy qısularğa tüzä almadı, "Sez bit jurnalistlar, añlarğa tieşsez, mondıy çaralar äzerleksez genä ütmilär,- dide.
Çallı, Ğafiulla Ğaziz
