Accessibility links

Ufada tatar oyışmaları wäkilläre kiñäş qordı


Ufada comğa könne Başqortstan tatar milli oyışmaları wäkilläreneñ kiñäşmäse bulıp ütte. Anda ike töp mäs'älä qaraldı. Berse dekaber başında Qazanda ütäçäk tatar cämäğätçelek oyışmaları cıyınına baru mäsäläse bulsa, ikençese, kiläse atna azağında “Watandaşlar forumı” dip atalğan oyışmanıñ çirattağı cıyının ütkärügä bäyle mäs'älä. Qazanda tatar oyışmalarınıñ 9 dekaberdä ütäçäk kümäk cıyınına Başqortstannan da tuğız tatar oyışmasınıñ citäkçese çaqıru alğan. Xäzer alar, Qazandağı oçraşuda çığış yasaw öçen, Başqortstan tatarları problemaları xaqında dokladlar äzerli.



Mäğlüm buluınça, Başqortstan tatar milli oyışmalarınıñ qayberläre respublikadağı Berläşkän oppozitsiä kileşterü şurasına häm “Watandaşlar forumı” dip atalğan oyışmağa kerä. “Watandaşlar forumı” oyışması bıyıl cäy Ufada oyıştırılğan ide. Başqortstanda xakimiätlärgä oppozitsiädä toruçı partiälär häm cämäğätçelek oyışmaları belän bergä aña berniçä tatar oyışması äğzaları da kerde.

25 noyäberdä ütäçäk Watandaşlar forumı cıyınında Başqortstandağı mäğärif ölkäsendäge xällär xaqında citdi söyläşü ütkärergä buldılar. Bu cıyın 15 noyäbergä ük bilgelängän ide, ämma, bina ala almaw säbäple, anı kiçekterergä buldılar. Comğa ütkän oçraşudağı söyläşü xaqında Başqortstan tatar milli-mädäni moxtariäte räise urınbasarı, professor Mäcit Xucin bolay söyläde:“Bez berençe mäs'älä itep Qazandağı kiñäşmägä baru turında söylättek. Kem nindi dokladlar belän çığış yasıy şul xaqta fiker alıştıq. Annan soñ ikençe mäs'älä – kiläse atnada ütäçäk “Watandaşlar forumı” cıyınına äzerlek buldı. Bez aña äle bina alu öçen öç kön çababız inde. Ber klu'nı 15 noyäbergä ük söyläşkän idek. Bezne aldadılar. Xäzer menä tağın öç urın belän söyläştek”.

Başqortstan Tatar milli-mädäni moxtariäte räise urınbasarı, professor Mäcit Xucin äytüençä, ägär kiläse atna azağında da Watandaşlar forumın ütkärergä respublika xakimiätläre urın birmäsä, uram cıyının ütkäräçäklär. “Miting ütkärü öçen dä möräcäğät itep xat yazılğan. Bez xäzer teläsä nindi wäzğıätkä aldan äzerlänäbez”, - di ul.

Fänis Fätxi, Ufa

XS
SM
MD
LG