Accessibility links

Кайнар хәбәр

Kogogin KamAZdan kitärme?


Jurnalistlar tarafınnan kötep alınğan älege belderü 16 noyäber könne, kiçke yaqta yasaldı. Başta Sergey Kogogin 5nçe şähär şifaxanäsenä ultra tawışlı cihaz tapşırdı. Xalıq telendä bu UZİ dip yörtelä. Annan soñ şuşındıy uq cihaznı "Çallı" profilaktoriäsenä dä tapşırdı. Älege çaralarda KamAZ generalın jurnalistlar da ozatıp yörde.

Äñgämä barışında, Kogoginnıñ kitü-kitmäwe turındağı soraw berençelärdän bulıp birelde. Sergey Kogoginnıñ cawabı: "Bu minem öçen teñkägä tigän soraw. Läkin avtomobil sänäğäte tiräsendä barğan bu ğibärälärneñ ber probleması şunda, avtomobil bazarında tärtip yuq. Bezdä idärä rule uñ yaqta bulğan maşinalar da yöri ala, ilebezgä teläsä niqadär tägärmäçle çüp-çar kertelä. Bazar ğayät zur häm ciñel avtomobillär satu küläme buyınça Auropada 4 urında torabız. Şuşı maylı qalca tiräsendä eteş-törteş bara. Kilep tuğan wäzğıättä Rusiä avtomobil sänäğäte öleşçä üze ğayeple. Çönki üzebezneñ pozitsiäne açıq itep kürsätä, xakimiätlärdän şuşı bazarnı yaqlaw çaraların eşlätä almadıq. Bu yaqtan bez qıtaylardan ayırılıp torabız. Alar yegerme yıl eçendä dönya avtomobil sänäğätendä aldınğılar rätendä bulu maqsatın quydılar häm bu yünäleştä uñışlı ğına adımnar yasıylar."

S.Kogogin üzeneñ AvtoVAZğa kitü turındağı imeş-mimeşlärgä mönäsäbäten belderde. Bu imeş-mimeşlär söyeneç-şatlıq kiterügä qarağanda anıñ açuın ğına qabarta ikän. "Min açıq häm tögäl itep äytäm, KamAZnı qaldırırğa cıyınmıym."- dide Sergey Kogogin häm KamAZ aksionerları belän 4 yıllıq kontrakt buluın, bu kileşüne özü öçen cirlek yuqlığın iskä aldı.

Kogogin KamAZdan kitä qalğanda da bu eş tiz genä eşlänä almıy ikän. KamAZ aksionerlar şurası Kogoginnıñ kitü turındağı ğarizasın tikşerep, cibärü-cibärmäw xaqında qarar qabul itärgä tieşlär. "Läkin, KamAZ belän tormışnıñ açısın-töçesen kürdem häm Rusiä masştabındağı citäkçe bula aluım da KamAZ belän bäyle, bu zavodqa zıyan kiterä torğan adımnarğa barmayaçaqmın. Şulay uq, kontraktnı özü turında başımda ber genä uy da yuq,- dip kisterep äytte general direktor.

Çınbarlıqta "Rosoboroneksport" tarafınnan Kogoginğa AvtoVAZğa küçü turında täqdim bulğanmı soñ? Sergey Anatolyeviç monısına da açıqlıq kertte. Täkdim bulğan. Läkin xäzergäçä räsmi täqdim tügel ikän, söyläşü süzdä genä alıp barılğan. Tağın ber çetrekle yağı bar - "Rosoboroneksport" AvtoVAZnıñ berdänber aksionerı tügel. Barlıq aksionerlar belän dä kiñäşläşü kiräk. Şulay da Kogogin mäsäläneñ ber çişeleşen täqdim itä - AvtoVAZdağı üzgäreşlär buyınça KamAZ üzenä yöklämä häm wazıyfalar alırğa mömkin. Monısı inde Kogoginnıñ ike berläşmä - KamAz häm AvtoVAZ belän beryulı idarä itärgä äzer ikänlegen kürsätä. KamAZ generalı bügenge wäzğıätne körçek dip atadı häm anı Rusiä matbuğat çaralarınıñ könnän-kön küpertülären, belderü yasaw öçen waqıtnıñ kilep citüen assızıqladı.

Ğafiulla Ğaziz, Çallı

XS
SM
MD
LG