Başqortostan Respublikasınıñ Neftekamski şähäre filarmoniäse artistları Novosibirsida uzğan II törki xalıqlar festivalennän qaytışlıy Omskida tuqtaldılar. Alar şähärneñ Malunsev isemendäge mädäniät sarayında zur konsert programması belän çığış yasadılar.
Şunı iskä töşerep ütärgä kiräk, Neftekamski artistları – 7 keşedän torğan icadi törkem – uzğan yılda Omskida bulıp kitkännär ide. Bu yulı isä alarnıñ sanı 17-gä citkän. Uzğan yılğı konsertlar tulı diärlek zallarda ütte, ä bıyıl ni säbäptänder tamaşaçı artıq küp bulmadı. Bu taraftan Rifqät äfände “ Eş bolay barsa, kiläçäktä artistlar sanı belän tamaşaçı sanınıñ tigezlänüe dä ixtimal,”- dip säxnädän şayartıp ta aldı. Soñraq, äñgämä barışında da ul tatar konsertlarında tamaşaçınıñ kimi baruına borçıluın belderde.
Rifqät Abdel'yanov yäş buında üz xalqınıñ mädäniätenä qızıqsınu uyatu yulların da bilgeläp ütte. Yäşlärne ğailädä tärbiäli başlarğa kiräk, çittän kilep berkem dä yärdäm itmäs, ölkännär, bezneñ kebeklär yöri almıy başlağaç, kem yörer bezneñ konsertlarğa dide ul.
Konsertlarnı saf başqort telendä alıp baruçı Närkäz Ğaysinanıñ seber yağında berençe buluı ikän. Äñgämä barışında süzen ul Novosibirskida uzğan festival'gä qarata xislären belderüdän başladı. Festival'gä xalıqçan äyberlär alıp kilergä kiräk ikän, ike yıldan tağı kiläbez, inde maxsus äzerlänep kilerbez di Närkäz xanım.
Neftekamski däwlät filarmoniäseneñ xudojestvo citäkçese, başqort moñnarın qurayda uynap xalıqnıñ küñelen yaulağan Aybulat Räxmätullin tamaşaçılarğa üzeneñ räxmätlären häm teläklären yulladı.
Östäp şunı da äytergä kiräk, Neftekamski artistları ölkä üzägennän 300-500 çaqrım yıraqlıqtağı Tara häm Tevriz rayonnarına da bardılar. Şunsı ayanıç, Omski ölkäse tatar awıllarına hönäri artistlar bik siräk barıp çıqsalar da, konsertlarda tamaşaçı küp bulmadı. Şulay da, Omskida da, awıllarda da alar, törle janrlarğa bay bulğan sıyfatlı konsertlar birdelär. Törkem citäkçese Rifqät Abdel'yanov, bez filarmoniädä eşlibez, çastnıy studiä tügel, kiläçäktä dä xalıqnı konsertlar belän tä'min itep toraçaqbız di.
Rozaliä Sayganova, Omski
