Accessibility links

Кайнар хәбәр

Omskida sabantuy bulırmı


Şuşı könnärdä şähär xakimiäte qarşında eşläwçe İctimaği koordinatsiä şurasınıñ çirattağı utırışları bulıp uzdı. Berençe utırış “Omski şähärendä“Mäğärif” milli proyektın ğamälgä aşıru”, ikençese “Omski şähärendä mädäniät üseşe konsepsiäse” digän temalar buyınça ütkärelde. Anda şähärdä eşläp kilüçe ictimaği, şul isäptän milli oyışmalar citäkçeläre qatnaştı, tatar oyışmalarınnan ölkä häm şähär milli-mädäni möxtäriätläre räisläre buldı.

Koordinatsiä şurasınıñ äğzaları “Mäğärif” milli proyektın ğamälgä aşıru” teması buyınça fiker alışqannan soñ, belem birü sferasında älege proyektnıñ töp yunäleşläre buyınça däwlät quyğan mäs'älälär belän täñgäl kilgän maqsatlı eş alıp barıla dip assızıqladılar. Bu eştä berençe çiratta mäktäpneñ häm uqıtuçı hönäreneñ däräcäsen kütärü, mäktäplärgä yäş belgeçlärne cälep itü, talantlı pedagoglar eşendä yärdäm kürsätü, sälätle uquçılarnı qızıqsındıru kebek çaralar kürü zarur dip bilgelände, axırda 4 punkttan torğan qarar qabul itelde. Qararğa ayırım alğanda, “Mäğärif” milli proyektın ğämälgä aşıru buyınça eşne däwam itärgä, anda ictimaği oyışmalarnıñ qatnaşlığın aktivlaştırırğa digän matdä kertelde.

Koordinatsiä şurasınıñ ikençe, mädäniät üseşe buyınça ütkärelgän utırışında, şuranıñ aldağı – 2007 yılğa eş planı ölgese qaraldı. Anda töp iğtibar şähär könen ütkärügä birelgän, bu bäyrämdä milli oyışmalarnıñ qatnaşlığı ayırım bilgelängän.

Ämma şunsı soraw tudıra, Rusiä külämendä alıp barılğan bu milli proyektta ayırım millätlärneñ üseşenä iğtibar birelmägän diärgä mömkin. Asılda milli-mädäni oyışmalar citäkçeläre cıyılğan älege utırışlarda da ayırım xalıqlarnıñ telen, mädäniäten üsterü buyınça süz bötenläy quzğatılmadı, barı tik alarnıñ qatnaşlığı ğına tikşerelde.

Döres, utırıştan soñ bulğan aralaşu waqıtında koordinatsiä şurası räistäşe Yevgeniy Lobunes tatar möxtäriäte räise Ğafiä Aleevanıñ kiläse yılda şähär külämendä Sabantuy ütkärergä kiräk digän täqdimen xuplawın belderde, bu çaranı grant aşa finanslawğa ireşergä kiräk digän kiñäş birde, Omskida sabantuy ütkärüne Koordinatsiä şurasınıñ 2007 yılğı eş planına kertergä wäğdä birde. Monıñ öçen möxtäriät citäkçese şähär xakimiäteneñ mädäniät idäräsenä maxsus ğariza belän möräcäğät itärgä tieş. Şulay itep, aldağı yılda omskilılar sabantuylı bulırğa da mömkinnär.

Omski yäşläre tatar estrada cırların yarata

Yäkşämbe könne “Umırzaya” tatar-başqort fol'klor ansamble yäşläreneñ konsertı bulıp uzdı. Konsert, kollektivnıñ başqa çığışlarınnan ayırma bularaq, Malunsev isemendäge mädäniät sarayında ütte häm anıñ programması tulısınça estrada cırlarınnan häm iyüllärennän tözelgän ide. Yäşlär ayırım konsert oyıştıruların, ansambl'neñ fol'klor yunäleştä eşläwe säbäple, üzläreneñ xalıqqa zamana cırların da kürsätergä teläkläre buluı belän añlattılar.

Äytergä kiräk, zalda tamaşaçı şaqtıy küp buldı häm artistlarnıñ här çığışı köçle alqışlar astında ütte. Soñınnan säxnägä çığıp räxmät äytüçelär dä buldı.

Şunı da äytergä kiräk, qızlar üzläreneñ çığışlarınnan qänäğät bulsalar, konsertnıñ töp oyıştıruçısı Röstäm Äxmätcanov üzeneñ cırların uñışlı buldı dip sanamıy.

Konsert 26 noyäberdä, änilär könendä buldı häm üzeşçän artistlar zalda utırğan änilärne qotlap alarğa bağışlağan cırlar başqardılar.

Rozaliä Sayganova, Omski

XS
SM
MD
LG