Räşit Vahapov isemendäge xalıqara tatar cırı festivaleneñ açılışı, anıñ barışı xaqında xäbär itkän idek, xörmätle tıñlawçılar. 2 aprel'dä cırçınıñ tuğan yağında - Tübän Novgorodta festival'neñ tantanalı açılışı ütte. Yıl däwamında Vahapov festivale tatarlar yäşägän küp kenä töbäklärne urap qayttı. Tatar cırı bäyräme Nurlatta, Riga şähärendä, İjaw, Çabaqsar, Ul'yanda, xätta Berlindağı millättäşlärebezne bergä tupladı. Xäzer isä çirat Qazanğa da citte. Tatarstan başqalasında Vahapov festivaleneñ yomğaqlaw konsertı ütäçäk.
Moñlı tatar cırı bäyrämen 8-9dekaber'dä Musa Cälil isemendäge opera häm balet teatrında tamaşa qılırğa mömkin. Oyıştıruçılar äytüençä, Räşit Vahapov festivaleneñ yomğaqlaw konsertına bik küp qunaqlar çaqırılğan. Bu xaqta pänceşämbe könne Tatmediä binasında uzğan matbuğat oçraşuında äytelde. Matbuğat oçraşuında Vahapov festivaleneñ töp oyıştıruçısı, Tatarstan” jurnalınıñ baş möxärrire Rifat Fättäxov, tatar xalıq cırçısı İlham Şakirov, şağır Rinat Xaris häm başqalar qatnaştı. Jurnalistlar isä bu oçraşuda azraq buldı. Xäyer, Vahapov festivale xaqında soñğı aralarda şaqtıy küp söylilär. Citäkçelär dä, cämäğätçelek yağınnan da älege festival'gä zur ähämiät birelüe bik yaxşı anısı. Rusiädä Vahapov festivale inde şaqtıy tanılu alğan. Xäyer, böten dönya buylap sibelgän xalıqnıñ cırına da çiklär yuq. Festival' Riga, Finlyandiä, Germaniä millättäşlärebezne dä söyenderde. Festival'neñ yomğaqlaw konsertı xaqında Rifat Fättäxov “Azatlıq” radiosına bolay dip äytte:
Älege konsert çın milli bäyräm bulaçaq dip äytä alam. Anda bik küp qunaqlarnı çaqırdıq bez. Alar arasında Färidä Qudaşewa, İlham Şakirov, Älfiä Afzalova, Zilä Sönğatullina häm başqalar bulaçaq. Monnan tış anda Qazaqstannan kilgän cırçıbız Bibigöl Tulegenova da qatnaşaçaq. Bügen, tatar estradası milli moñnardan yırağaya barğan arada, älege konsert millättäşlärebezne moñlı tatar cırları belän söyenderäçäk.Monnan tış festival'neñ yomğaqlaw konsertında Mäskäw, Ul'yan, Piterburdan, Rusiäneñ başqa töbäklärdän, çit illärdän kilgän cırçılar da qatnaşaçaq. Konsertta Räşit Vahapov isemendäge premiäne tapşıru tantanası da bulaçaq. Älege büläkkä Rusiäneñ atqazanğan, Tatarstannıñ xalıq artistı Älfiä Afzalova nämzäte täqdim itelgän. Şuşı çaralar 8-9dekaber'dä Musa Cälil isemendäge opera häm balet teatrı säxnäsendä ütäçäk.
Al'bina Zäynulla
