Moñarçı Çallı xalqınıñ ber öleşe törle firqälär häm millätçelär oyıştırğan çaralarğa quşılıp şähär uramnarına çığalar, üz taläplären dawlap, yullarnı yabuğa qädär barıp citälär ide. Menä berençe tapqır, keşelär, psixoterapevt, ekstrasens Kaşpirovskiynı yaqlap uramğa çıqtı. Çallıdağı berençe seansları 1990 nçı yılda bulğan ide. Bıyılğı seanslar 5 nçe dekaberdä başlanıp, 9 nçı dekaberdä betärgä tieş ide. Läkin ekstrasensnıñ çığışlarına şähär xakimiäte kirtä quydı. Xakimiät röxsät birmäwne bolay añlattı: massaküläm çaralar ütkärgändä şähär başqarma komitetı belän kileşergä kiräk. Şulay bulmağanda, keşelär belän uynarğa röxsät bulmayaçaq. 5-6 dekaber könnärendä buşlay seansqa kerergä telägän meñläp keşe, Kaşpirovskiyğa röxsät birelmäwen, seans bulası KamAZ mädäniät yortınıñ bikle buluın kürgäç, uramğa çığıp, transport yulların yapqan ide. Alar arasında Kaşpirovskiy äfände üze dä buldı, annan soñ ul başqarma komitet citäkçese urınbasarı Wasıyl Şayxraziev belän dä oçraştı. Protest çaralarına qaramastan, xakimiät tarafınnan röxsät bulmadı. 6 nçı dekaber könne dä yözlägän xalıq şähärneñ törle poçmaqlarında protest belderüençä çıqtı. Seanslarınıñ bulmıy qalu säbäbe nidä? KamAZ mädäniät yortı direktorı Natal'ya Mavrenkova äytüençä, älege seanslar xaqında nindider Ruslan Şakirov söyläşü alıp barğan. 25 nçe noyäbergä qädär ul bu eşne oyıştırırğa xoquqı barlığı turında beleşmä kiterergä tieş bula. Beleşmä yuq, dimäk röxsät tä yuq. Şähärneñ cämäğätçelek belän eşläw idäräse başlığı Valentina Nurmöxämmätova belderüençä, seans bulası urında häm uramda üzläreneñ agressiv totuçılar arasında berniçä Perm ölkäse keşese dä bula. Şul isäptän, Kaşpirovskiy seansların oyıştıruçı Ruslan Şakirov. Alarnıñ şäxeslären Çallı militsiäse açıqlağan häm dürt yağığız qibla dip cibärgän. Äye, xäzer xalıqnı massaküläm däwalaw öçen Rusiä sälämätlek ministrlığı röxsäte kiräk ikän. Ä menä seansqa dip kilüçe qayberäwlär fikerençä, SSSR tarqalğanda Kaşpirovskiy, Çumaq kebeklär televizor, radionıñ türendä utırıp, xalıqnı däwaladılar, keşeneñ iğtibarın aldılar. Şulay da, ni öçen Kaşpirovskiy seansına bardığız, digän sorawğa, ölkän yäştäge Nariman abzıy: "40 yıl maşina yörttem, awıruım xättin küp, räsmi meditsinağa ışanmıym, dide.
Ğafiulla Ğaziz, Çallı
