Accessibility links

Кайнар хәбәр

Çistay yegete ülemendä "qart" soldat ğäyeplänä


18 yäşlek Rail Bikmöxämmätov xärbi xezmäten ütägändä häläk bulğan. 13 dekaber'' könne Rail xärbi bülektän yıraq tügel cirdä asılınıp ülgän. Comğa könne yegetneñ gäwdäsen Çistayğa qaytardılar. Ämma häläk bulğan yegetne ata-ana qulına yun''läp tapşırmadılar da. Bikmöxämmätovnı Kön''yak Saxalinnan kitergän ike xärbi, poyezd Qazanğa kilü belän tabutnı vokzalda qaldırıp qaçqannar. Bu ofitserlarnı küpme genä ezläp qarasalar da, taba almağannar. Xoquqçı German Aletkin belderüençä, mondıy oçraqta xärbilär yegetneñ gäwdäsen öyenä qädär kiterergä häm anıñ dokumentların cirle voenkomatqa tapşırıp kitärgä tieş ide.

Railneñ yaqınnarı yeget belän şimbä könne xuşlaşqannar. Anı cirlägän könne Çistayğa Qazannan xoquq belgeçläre häm tabip ta kilgän. Xirurg Vladislav Kalinin yegetneñ tänendä küp sanlı cäräxätlär tapqan. Tabip belderüençä, älege cäräxätlär qıynaw ezläre bulırğa mömkin.

Şul uq könne Saxalinda Rail belän bergä xezmät itkän yeget östennän cinayät eşe quzğatıldı. Bu yeget ber yıldan artıq xezmät itkän. Railgä qarata köç qullanuda ğayıplängän älege soldat barısın da üze söyläp birgän, bu xaqta düşämbe könne Kön''yak Saxalin garnizonınıñ prokurorı Konstantin Rojkov “İnterfaks” agentlığına xäbär itte. Rojkov süzlärenä qarağanda, Rail Bikmöxämmätov ülär aldınnan bik nıq qıynalğan bulğan. Prokuror şulay uq Bikmöxämmätov xezmät itkän xärbi bülektä tikşerülär baruın da äytkän. Anıñ belderüençä, älegä xärbi bülektä xärbilärne ezärlekläw oçraqları terkälmägän. Ämma Saxalin xoquqçılarınıñ süzlärenä qarağanda, moña qädär anda rus bulmağan yegetlärne, tatar, çuaşlarnı qıynaw oçraqları bulğan. Ber soldat üzeneñ qan tamırların kiskän, ikençese eçke orğannarı şartlap ülgän, ber asılınğan yegetne qotqarğannar.

Qazandağı “Möslimä” xatın-qızlar oyışması räise Älmirä Ädiätullina soldat anaların yaqlaw komitetın citäklägän keşe. Häläk bulğan Çistay yegete turında ul bolay dide:

Railneñ yazmışı bik qızğanıç. Anı bit qotqarırğa bula ide. Härxäldä ata-anasına niçek tä yärdäm itärgä bulır ide. Bezgä xäzer yänä analar komitetın tergezergä kiräk. Armiägä kitüçe atağa, anağa ber kileşü tözergä kiräk xäzer. Ägär dä, Alla saqlasın, ulları armiädän äylänep qaytmıy ikän, däwlät alarğa şuşı ulları öçen aqça tüläp torırğa tieş. Balanıñ niqädär qäderle buluın añlatıp torası yuq, ata-ana ğömere buyı däwlättän kompensatsiä alıp torırğa layıqlı.

Rail Bikmöxämmätovnıñ änise ulın cirlägännän soñ üze bik awır xäldä yata. Railneñ bertuğan señlese häm enese dä bu yuğaltunı bik awır kiçerälär.

Al''bina Zäynulla

XS
SM
MD
LG