Tatarstannı bu atnada şaqtıy zur häm qızıqlı waqiğalar kötä, x.t. Bilgele bulğança, 20 ğinwarda Mintimer Şäymievnıñ tuğan köne. Bıyıl ul üzeneñ 70 yıllıq yubileyın bilgeläp ütäçäk. Äytergä kiräk, tuğan köngä äzerlek inde küptännän barsa da, bu xaqta mäğlümät ällä ni küp tügel. Atna azağında Qazanda Rusiä Däwlät Şurası utırışı uzaçaq. Anda küp kenä töbäk citäkçeläre, Rusiä citäkçeläre wäkilläre qatnaşaçaq. Utırışta süz ildä toraq mäs’äläsen xäl itü turında baraçaq. Cıyılışnıñ teması da oçraqlı tügel. Şäymiev citäklägän Tatarstan Rusiä külämendä xalıqnı toraq belän tä’min itüdä aldınğılardan sanala. Eş belän berrättän Mintimer Şäymievnı qotlawlar da bulaçaq älbättä. Qayber mäğlümätlärgä qarağanda, Tatarstan prezidentın qotlarğa Vladimir Putin da kiläçäk. Ul comğada uzaçaq räsmi çaralarda qatnaşır dip kötelä. Kiçen isä rusiä prezidentı qatnaşlığında Qazan kremlendä tantanalı kiçke aş planlaştırılğan. Xäyer, bäyräm itü ber kön belän genä çiklänmi. Däräcäle qunaqlar belän Mintimer Şäymievnıñ 70 yäşlegen bäyräm itü şimbä könenä dä bilgelängän. Tantana Qazannıñ Piramida küñel açu üzägendä uzaçaq. Anda kem çığış yasayaçaq, nindi artist, cırçılar närsä başqaraçağı turında da äle tögäl mäğlümät yuq. Alay da, kiçäneñ konsert öleşe Salawat Fätxetdinovsız, Aqtanışnıñ fol’klor ansambl’sez ütmäs kebek. Ğädättägeçä, Tatarstan yoldızları belän genä çiklänmiäçäklär. Çarada mäsälän tanılğan cırçı Sofiya Rotaru da qatnaşır dip kötelä. Kilgän häm cirle yoldızlar yubilyarnıñ häm kilgän qunaqlarnıñ yaratqan äsärlären başqaraçaq.
Şäymievnıñ kollegaları, dusları ğına tügel, ğadi tatarstanlılar da anı qotlarğa teli. Mäsälän, Tatarstan yäşläre gäcite inde şimbä sanında uq respublika prezidentına xalıqnıñ qotlawların bastıra başladı. Anda olılar, balalar, yäşlär, xätta tulı ğailälär Şäymievnı täbrikli, räxmätlären belderä, aña şiğerlär bağışlıy. Xatlar yazuçılar arasında yubilyarnıñ klasstaşı Äbüzär Zäynullin uñışlar teli, Tolımbay awılınnan Fäxretdinova 4 srokka qalunı teli, 87 yäşlek Fätsinä Batırşina sälämli, ä menä Fatixovlar ğailäse Şäymievqa menä mondıy şiğri yullar cibärgän. Tatarstanda yaqtı qoyaş bit sin. Bar xalıq ta xörmät itälär. İlgä bulğan yaxşılıqlarıñ, yaqtı kiläçäkkä iltälär.
Tatarstan prezidentı häm anıñ yubileyın respublikada ğına iskä almıylar. Rusiäneñ mäğlümät çaraları da Şäymievnıñ tuğan könen iğtibarsız qaldırmadı. Rossiya kanalınıñ yäkşämbedä efirğa çıqqan atnalıq näticälär programmasında Tatarstan prezidentına ayırım ber yazma bağışlandı. Respublika belän inde 20 yıldan artıq citäkçelek itüçe iñ däräcäle häm üzençälekle töbäk liderı turında söylägändä, Qazannıñ tözeleşläre, respublikanıñ xäzerge uñışları, Tatarstanğa bäyle tarix mizgellär turında äytelde, Şäymiev ğailäse xaqında süz buldı. Pravoslav çirkäw häm Qol Şärif mäçete urnaşqan kreml’, respublikadağı xalıqlar duslığı da iskä alındı. Ul üze citäklägän töbäkne başqalarğa ürnäk itärlek däräcägä kütärde. Şuña da, Mäskäwneñ aña mönäsäbäte üzençälekle, Şäymievtan tış andıy däräcägä bik azlar iä bula aldı, dip sanıylar Mäskäw jurnalistları.
Ä menä Möslim-press mäğlümät agentlığı xäbär itüençä, Mintimer Şäymiev Rusiäneñ möselman cämäğätçelege arasında da şaqtıy populyar ikän. Rusiädä iñ abruylı häm ışanıçlı säyäsätçelär isemlegenä ütkärgän soraştıruda Tatarstan prezidentı Vladimir Putinnan soñ ikençe urında tora. Xäyer, Şäymievnıñ danı inde Rusiä belän genä dä çiklänmi ikän. Tatar-inform agentlığı mäğlümätlärenä qarağanda, Tatarstan citäkçesenä Söğud patşası Fäysal isemendäge xalıqara premiä tapşırılğan. Älege büläk Şäymievqa respublikada islam dinen üsterügä kertkän öleşe öçen birelgän. Menä şundıy küpsanlı häm törle büläklär aldı häm äle alaçaq Tatarstan prezidentı Läkin üzeneñ 70 yıllıq yubileyına iñ zur büläkne Mintimer Şäymiev alay da Mäskäwdän ömet itä. 19 ğinwarda Rusiä Däwlät Dumasında Tatarstan belän Rusiä arasındağı wäkälätlärne büleşü turındağı şartnamä qaralırğa tieş digän mäğlümätlär bar. Bu yulı şartnamä çınlap ta Dumağa kertelep, parlament tarafınnan xuplansa, Mintimer Şäymiev Mäskäwdän bik zur häm küptän kötelgän büläk alaçaq.
Gölnaz İlgizär
