Ölkä tatarların teatrnı ülep yaratuda ğayepläp bulmıy inde. Teläk zur bulsa da, konsertlarğa yaxşı yörsälär dä. Ä bu yulı 1100 keşe sıyarlıq zalda buş urınnar bik az ide. Monıñ säbäbe – tamaşanı oyıştırğan ike yegetneñ cegärlegeme, ällä inde İlfaq Şihapovnıñ üz äsärenä bik tä uñışlı isem saylawımı: “İserek aynısa, xäyerçe bayısa…” dip atalğan ul. Zamanası şul bit: yäşäyeşneñ töp maqsatı beräwlär öçen araqı bulsa, ikençeläreneke – aqça, aqça, aqça ğına…
Aktual' tema, dimäk, - kön qadağına suğa torğan tema.
İke kürşe alkaşnıñ üz xatınnarın iza çikterüläre yañalıq tügel inde, anısı. Kölke aşa bulsa da. Ä menä oçraqlı ğına kilep eläkkän baylıqnı faydalanu ısulları – kölke genä tügel, taciğa da ikän äle. İlfaq Şihapov monı yarıp salğan, häm üzenä genä xas ısullar belän bu kämit bändäläreneñ nindi sası sazlıqqa töşkännären kürsätü belän genä çiklänmiçä – kölke aşa citdi uylanırğa da mäcbür itä.
Ä Bua artistları anıñ äyter süzen tamaşaçığa tulayım citkerä aldılar, diärgä kiräk. Teatrnıñ citäkçese Rail Sadriev tamaşa aldınnan üz kollektivınıñ oluğ şatlığı belän dä urtaqlaştı.
(İlbaşı Mintimer Şäymiev 38 million torğan binanı şuşı kollektiv qaramağına birergä qarar qılğan ikän. Häm teatr räsmi status alğan. Rail äfände äytüençä, Yevropada nibarı 3 satirik teatr bar: Bolğariädä, Mäskäwdä häm Buada ğına. Häm şuşı yañalıqnı berençe yañğıratuı da Sember tamaşaçısı aldında, dide ul.)
Älbättä inde, İlbaşına oluğ räxmätlären citkerüe dä ozın-ozaq alqışlarğa säbäp buldı. Tağın ber iğtibarğa layıq küreneş - teatr artistları üzeşçännär genä: balalar baqçası mödire, şağir-kompozitor-cırçı, klub mödire, uqıtuçılar… Rail üze dä aspiranturada uqıy ikän äle. Alda dissertatsiä yaqlaw tora, di.
Täqdim itelgän äsär – kollektivnıñ 8-nçe eşe. İlfaq Şihapovtan tış, Tufan Miñnullin, Danil Salixov, Rämil Kamaliev äsärlären säxnäläştergännär.
Rail Sadriev tamaşa başında uq Semberneñ Yäşlär yal itü üzäge dip atalğan binanı üz teatrınıqı dip iğlan itte. Döres, satıp alırğa aqça citmäs, ä menä daimi räweştä arendağa alu mömkin. Monıñ öçen zallarnıñ härwaqıt şulay tulı buluı da citä. Monı alqışlap qarşılawğa cawap itep, ay sayın kilergä wäğdä itte. Säbäbe dä yuq tügel: ara da yaqın - 80 çaqrım ğına, xalıq ta üzebezneke: biredä bit, nigezdä, Bua - Çüpräle mişärläre yäşi. Yış kilüneñ maqsatı – teatrdan bizgän tamaşaçığa başta kölke aşa teatrnıñ tämen añlarğa yärdäm itü häm artaban citdi, fälsäfäi mäğnäle äsärlär qararğa da äzerläw. Xalıqnıñ tamaşa barışında därräw kölep utıruı, köçle alqışlar bu niätneñ tormışqa aşuına da ışandırırlıq buldı.
Fevral'dä Almaz Xämzin, Şamqaylar qatnaşlığındağı tamaşada satirik miniatyuralar belän öleş kertü, martta “Bäxeteñne käcä sözsen” digän satira wäğdä birde. Soñğısına reklama sıyfatında kürsätelgän özek tä bik cılı qabul itelde. Aprel'dä dä ber kämit bulır, ä menä mayda tamaşaçığa yal wäğdä itte Rail. Çönki may – kişer, çögender, käbestä utırtu ayı.
4 säğättän artıq barğan tamaşadan xalıq bik tä qänäğät bulıp taralıştı. Bulmıy ni: xalıq telendä Mişärstan dip ataluçı Sember qalasındağı bu tamaşanı İlsöya Bädretdinova “Mişär gimnı” belän tämamladı bit. Ä tamaşaçı 10 minuttan da artıq ayağürä basıp köçle alqışlır belän aña häm başqa qunaqlarğa üz räxmäten belderde.
Ayrat İbrahim, Sember
