Tatar yegete bäygeläre xaqında radio tıñlauçılarıbız işetep, uqıp belälär inde. Ä menä tatar malayı bäygese Çallı qalası öçen yañalıq bulıp tora. Bäygeneñ başı 2006 yılnıñ noyäber ayında başlandı häm şuşı ayda 5-8 sıynıflarda uquçı malaylar üz mäktäplärendä köç sınaştılar. Köç sınaşu digänne tatarnıñ ğöref- ğädätlären, yolaların belü, üzeñneñ hönärläreñne kürsätü belän bäyle ide. Uzğan yıl mäktäplärdä ciñü yaulağan tatar malayları menä bıyıl, ğinwar ayınıñ soñğı könnärendä "Çaqmataş" isemen yörtkän balalar icat üzägendä yarımfinal uyınnarında qatnaştılar. Şunısın iskärtik, bu- Çallı tatar malaylarınıñ berençe bäygese ide. Yarımfinalda 36 malay qatnaştı häm şularnıñ 13е, berniçä aydan soñ şähärneñ iñ däräcäle bulğan Sara Sadıyqova isemendäge konsertlar zalında final uyınnarında qatnaşaçaq. İnde, "Çaqmataş" balalar icatı üzägendä bulğan malaylar yarışına kilsäk, ul şaqtıy qızu da, bäxäsle dä, mawıqtırğıç ta ütte. Tatarstannıñ atqazanğan mädäniät xezmätkäre Bulat Säläxov citäkçelegendäge xökemdarlar komissiäse tege-yäki bu malayğa östenlek birä almadılar. Şuña kürä, bulıp uzğan çığışlarnıñ videotasmasın qabat-qabat qarağannan soñ ğına finalğa uzuçılarnıñ isemnäre bilgele bulaçaq. Jyuri äğzäläre bu eşne şuşı atnada tögällärgä wäğdä birdelär. Şuña kürä, "Tatar malayı" bäygesendä qatnaşuçılarnıñ xökemdarlar fikeren genä belik. Azatlıq xäbärçesenä jyuri ägzäse Venera Zaripova häm jyuri räise Bulat Säläxov bolay didelär:
- Bäyge bik oşadı, yegetlär nıqlap äzerlängännär, milli ğöref-ğadätlärebezne onıttırmaw yünäleşendä zur eş başqardılar. - Bäygeneñ iseme "Tatar malayı" bulsa da, min anda qatnaşuçılarnı malaylar dip äytmäs idem. Alar- çın tatar yegetläre. Tatar betä, betä dilär. Şuşı bäygedän soñ bu fiker belän kileşmim. Bez yäşäyäçäkbez äle.
Bulat äfände äytüençä, tatar malayı bäygese kiläçäktä tatar yegete bäygesenä yañadan aña sälätle balalar biräçäk.
Çallı, Ğafiulla Ğaziz
