Accessibility links

Mäskäwdä jurnalistlarnı büläklädelär


Rusiäneñ kitapxanälär assotsiatsiäse, häm yıl sayın ütkärelä torğan matbuğat kürgäzmäseneñ oyıştıru komitetı, näq ber yıl elek, Rusiä külämendä basıla torğan köndälek matbuğatnıñ iñ yaxşı dip sanalğannarın, “Matbuğatnıñ altın fondı”na kertelüe turında ayırımlılıq bilgesen iğlan itkän inde. 2006 yılnıñ fevralendä Rusiä külämendä matbuğatnıñ altın fondına 223 basma kertelü turında beldersälär, bıyıl ul isemgä 338 basma layıq bulğan. 12 fevral'dä Rusiäneñ baş kitapxanäsendä, böten Rusiädän kilgän jurnalistlar aldında maqtawlı isemgä layıq buluçı gazeta jurnalllarğa häm jurnalistlarğa büläklär tapşırıldı. Kiläse yıldan “Matbuğatnıñ altın fondı”na kertelgän basmalar matbuğatqa yazılu kataloklarında da ayırım bilge, yäğni altın fondqa kertelü bilgese kürsätelep urın alaçaqlar. Bıyılğı Mediasezonnıñ tantanalı açılışında iñ berençe büläk “Tatarstan” jurnalına tapşırıldı. “Tatarstan” jurnalı 14 nçe xalıqara hönäri matbuğat kürgäzmäseneñ “Altın beydj” bülägenä layıq buluı turında iğlan itelde häm ul büläk jurnalnıñ baş möxärrire Rifat Fättäxovqa tapşırıldı. Şunısın da äytergä kiräk, “Tatarstan” jurnalı Rusiä matbuğatınıñ altın fondına uzğan yıl uq kertelgän ide. Ä inde “Altın beydj” büläge bıyıl barı tik “Tatarstan” jurnalına ğına birelde. Bu xaqta baş möxärrir Rifat Fättäxov: “Bu büläk “Tatarstan” jurnalı öçen genä tügel, Tatarstan öçen dä zur ähämiätkä iä. Çönki monda büläkne professionallegebez öçen birälär” dide. Ğömümän alğanda bıyılğı matbuğat büläklärenä layıq buluçılar, berençelär arasında öç respublika- Tatarstan, Başqortstan. Çeçen respublikaların ayırıp äytergä bula. Bıyıl Başqortstannan 31 basma Rusiä matbuğatınıñ altın fondına kertelü turında tanıqlamalar aldı. Başqortstanlılarğa şulay uq matbuğat kürgäzmäsendä iñ yaxşı bizäleş alğan stend öçen dä ayırım diplom tapşırdılar. Bu xaqta Başkortstannıñ jurnalistlar berlege räise Marsel Sälimov: “Bıyıl bezneñ respublikada zur bäyräm. Başqortstannıñ Rusiä däwlätenä üze teläp kerüenä 450 yıl tula. Bu büläklärne respublika bäyräme büläge dip qabul itäbez, dide ul. Ä diplomnar belän Tatarstannan 12 basma büläklände. Alar arasında “Söyembikä”, “Yalqın” jurnalları häm “Saban tuyı” gazetası da bar ide.

Şulay itep bügen, Mäskäwdä Başqortstan häm Tatarstan matbuğatı häm juranlistlarına üzläreneñ hönäre ostalıqlarına iä bulğanlıqnı tanıta torğan diplomnar tapşırıldı.

Näzifä Kärimova, Mäskäw

XS
SM
MD
LG