Accessibility links

Кайнар хәбәр

Ufada BR Tatar kongressı utırışı ütte


Comğa könne Ufada Başqortstan Tatar kongressı Başqarma komitetınıñ bıyılğı berençe kiñäytelgän utırışı bulıp ütte. Anda Başqarma komitetnıñ respublika şähärlärendäge häm rayonnarındağı bülekläre citäkçeläre dä kilde. Kön tärtibenä töp 4 mäs'älä kertelgän bulsa da, törle mäs'älälär tärtibendä tağın da berniçä mäs'älä tikşerelde. Utırışnı Başqarma komitetnıñ räise Ruşan Gallämov açtı häm alıp bardı.

İñ başta utırışta qatnaşuçılar BR Tatar kongressı Başqarma komitetınıñ 4 äğzasınıñ ğarizaların qaradı. Komitet äğzaları, törle şäxsi säbäpläre arqasında, üzlären Başqarma komitettan çığaruların sorağan. Barlıq üteneçlär dä qänäğätländerelde häm xäzer Tatar kongressı Başqarma komitetında cämğısı 24 keşe qaldı.

Utırış başında bıyıl BR Tatar kongressı tarafınnan başqarılaçaq eşlär xaqında da süzlär buldı. Kiläse atnada Ufada häm Mäläwez rayonında tatarnıñ kürenekle şäxesläre – Zaqir Rämiev- Därdmänd belän Säğit Rämievkä bağışlanğan çaralar ütäçäk. Şular xaqında Kongress Başqarma komitetınıñ mädäniät mäsäläläre komissiäse räise Marat Şäripov söyläde.



Utırışta çirattağı süzne tanılğan ğalim, professor Räif Ämirov aldı. Ul uzğan yılda Tatar kongressı tarafınnan başqarılğan eşlär xaqında söyläde. Şulay uq Ufa “Nur” tatar däwlät drama teatrı tiräsendäge problemalarğa da tuqtaldı ul. “Nur” teatrında problema ike yaqlı, - di Räif Ämirov. - Berençedän, anıñ binasınıñ un yıl buyı tözelep betmäwe. İkençedän teatrnıñ eçendäge ruxi xalät häm repertuar mäsäläläre”.

Kongress utırışında anıñ äğzası Ayrat Ğiniätullin respublikada tatar mäğärifenä bäyle problemalarğa tuqtaldı, ğibrätle xällär turında mäğlümatlar birde. “Xätta tatar gimnaziälärendä barlıq yazular başqort telendä yazıla, - dide ul. - Misal öçen, Ufanıñ 65 nçe sanlı tatar gimnaziäsendä barlıq elmä taqtalar gel başkırtça yazılğan. Bu bit tatarnı bötenläy mısqıl itü”.

Başqarma komitet utırışında Ufadağı tatar gimnaziäse öçen dip birelgän binanı cimertü kisken ğäyeplände häm şuşı uñaydan “Başqortstan Respublikasında ictimaği-säyäsi wäzğıät” digän Belderü dä qabul itelde.

Bıyıl iyün ayında Başqortstan Tatar kongressınıñ älege Başqarma komitetınıñ wäqälätläre waqıtı çığa. Şuña kürä dä bu cäydä BR Tatar kongressınıñ IV qorıltayın ütkärü mäsäläse dä qaraldı bu kiñäşmädä. Anda qorıltayğa äzerlek alıp baru häm anı ütkärü öçen maxsus oyıştıru komitetı tözelde.

Fänis Fätxi, Ufa

XS
SM
MD
LG