Çallı töbägennän Däwlät Dumasına deputat bulıp saylanğan Oleg Morozov Duma räiseneñ berençe urınbasarı wazıyfaların başqara. 2 mart könne ul şähärneñ xakimiät binasında jurnalistlar belän matbuğat konferensiäse ütkärde. Oçraşunıñ soraw-cawap öleşenä qädär Oleg Morozov üze çığış yasadı. Berençe çiratta Rusiädä qabul itelgän milli proyektlarnıñ barışı belän tanıştırdı. Annan soñ Tatarstan-Rusiä Şartnamäsenä fikeren belderde. Parlament räise urınbasarı äytüençä, Şartnamäneñ Federatsiä Şurasınnan ütmäwe "Spravedlivaya Rossiä" häm "Yedinaya Rossiä" firqäläreneñ üzara köräş näticäse. Ul Tatarstan prezidentı Mintimer Şäymieмnıñ wazıyfasınnan kitü turındağı xäbärlärgä dä mönäsäbäten belderde:
- Tatarstan prezidentı Mintimer Şäymieмnıñ 3 yıl prezidentlıq waqıtı bar. Rusiä prezidentı şuşı waqıt eçendä aña ışanıçsızlıq belderergä mömkin. Läkin min moña nigezlär kürmim. Ägär Tatarstan prezidentın almaştıru bula ikän, bu- zur tetränülärgä kiteräçäk, dide Däwlät Duması räise urınbasarı. Soraw- cawap tärtibenä küçkäç, Azatlıq xäbärçese Oleg Morozovqa berniçä soraw belän möräcäğät itte. Şularnıñ berse, Däwlät Dumasında Tatarstan-Rusiä Şartnamäse öçen tawış birgändä Başqortstan deputatlarınıñ qarşı tawış birüläre uñayınnan ide. Cawap mondıy buldı:
- Tawış birü aldınnan min Başqortstan deputatları belän oçraştım. Alar açıqtan-açıq äyttelär: "Bez Şartnämägä qarşı tawış biräçäkbez. Çönki älegä qadär Tatarstan Şartnämäse kebek Başqortstan-Rusiä kileşüe bulırmı digän sorawğa cawap almadıq." Mondıy argument mine bik ğäcäpländerde, dide Oleg Morozov häm Tatarstan-Rusiä Şartnamäsen şik astına quyıp, alar üzläreneñ kileşülären dä bilgesezlekkä quyuların belderde. Şartnämäneñ federatsiä Şurasında raslanmawın Oleg Morozov "Yedinaya Rossiä" belän "Spravedlivaya Rossiä"neñ köräş näticäse digänen äytkän idem. Şunı raslap, Morozov tağın mondıy fiker äytte: Federatsiä Şurasında çığış yasağan Narusova äytte: Älege şartnamä Rusiädä separatizmğa yul alaçaq. Bu - sataşu, dide Morozov.
Azatlıq xäbärçese Rusiä parlamentı räise urınbasarına "Azatlıq" radiosınıñ Qazannan tuqtaluı Tatarstanğa bulğan basım tügelme?- digän sorawnı birde. Cawap mondıy: "Min bu xaqta berençe işetäm häm anıñ säbäplären belmim häm nindider säyäsi maqsatlar belän bäylämim. Bu turıda qarar qabul itelgän ikän, bu qara säyäsi tügel."
Ğädättä, Oleg Morozov, Çallıda bulğan oçraşular waqıtında üzenä bilgesez wäzğıät turında äytelsä, "Sorawnı öyränermen, cawap birermen", dip äytä torğan ide. Bu yulı alay dimäde.
Ğafiulla Ğaziz, Çallı
