Ufağa Älmät tatar däwlät drama teatrı sänğat'kärläre çirattağı icat säfärenä kilde. Älmätlelärneñ bu gastrol'läre 10 martta başlana häm alar Ufanıñ iñ matur mädäniät uçaqlarınıñ berse – Başqortstannıñ Mostay Kärim isemendäge Milli yäşlär teatrı säxnäsendä çığış yasayaçaq.
Älmät tatar däwlät drama teatrı kollektivınıñ icat säfäre Ufada 15 martqa qadär däwam itäçäk. Şuşı könnärdä qunaqlar Başqortstan tamaşaçısına, balalar tamaşaların da isäpkä alsañ, distägä yaqın spektakl' täqdim itäçäk. Alar arasında Başqortstan dramaturglarınıñ da äsärläre bar.
Älmät tatar däwlät drama teatrınıñ baş rejisserı Ğafur Kayumov äytüençä, sänğat kollektivı Ufa säfärenä citdi äzerlängän häm şatlanıp kilgän.
“Ufağa şatlanıp kildek. Ni öçen digändä, bezneñ töp märkäzebez Qazan bulsa, anıñ yänäşäsendä Ufa tora, - Di Ğafur äfände. - Gastrol'lärne Mostay Kärimneñ “Qız urlaw” komediäse belän başlıybız. Mostay Kärim isemendäge Milli yäşlär teatrı säxnäsendä Mostay äsäre belän başlaw üze ber matur xäl”.
Älmät teatrı Ufağa Tufan Miñnullinnıñ “İsänmesez” komediäsen, Mansur Ğiläcevnıñ “Tuy külmäge” spektaklen, Nadejda Ptuşkinanıñ “Barı ber genä” tamaşasın da alıp kilgän. Gastrol'lär repertuarında tağın ber tamaşanı ayırıp äytergä kiräk. G. Qamalnıñ “Berençe teatr” p'yesası belän G. Qariewnıñ “Artist” äsäre nigezendä säxnäläşterelgän “Ayırılabız, axrısı” dip isemlängän spektakl' ul. Anı älmätlelär tatar teatrınıñ yöz yıllıq yubileyına bağışlağan.
Fänis Fätxi, Ufa
