Başqortstannıñ Kuşnarenko rayonınnan bu könnärdä bik qızu xäbärlär alına. Andağı cämäğätçelek cirle külämdä baş kütärülär äzerli. Xalıq rayon xakimiäte başlığı Sergey Kasatkinnıñ idarä itü alımnarınnan qänäğät tügel.Öç yıl elek Ufadağı ber şirkättän kiterep quyılğan Sergey Kasatkinnıñ eş itü ısulların urındağı xalıq baştan uq oşatmağan ide. Bernindi säbäpsez törle citäkçelärne urınnarınnan buşatuda, buldıqlı eşquarlarnı ezärlekläwdä ğayıplädelär anı. Menä öç yıl ütügä xällär tağın da kiskenläşkän anda. Kiläse atna azağında, atap äytkändä - 24 mart könne Kuşnarenko rayonı üzägendä rayon xakimenä qarşı zur miting ütäçäk. Bu uram cıyını öçen röxsät alınğan da inde.
Kuşnarenko rayonı xalqınıñ qarşılıq çarasında törle qatlam xezmätçännär qatnaşaçağı mäğlüm. Ezärleklänüçe eşquarlar da, törle awıl xucalığı şirkätläre citäkçeläre dä, uqıtuçılar, mäktäp direktorları, balalar baqçaları mödirläre dä häm tağın küp kenä hönär iäläre çığaçağı mäğlüm bu mitingqa.
Şuşı qarşılıq çarası aldınnan “Azatlıq” radiosı xäbärçesenä Kuşnarenko rayonınnan İlfir Qotdusov möräcäğät itte. “Başqortstanda “Azatlıq” radiosınnan başqa ber genä mäğlümat çarası da bezneñ problemalarğa iğtibar itmäyäçäk, çönki barısı da xakimiätlärgä xezmät itä häm döreslekne söylärgä qurqa”, - dide İlfir äfände. İlfir Qotdusov Kuşnarenko rayonında kiñ bilgele şäxes. Andağı Baytallı isemle tatar awılı urta mäktäbeneñ direktorı bulıp eşli ul. Bu cawaplı wazıyfanı 18 yıl buyı tarta inde İlfir äfände. Şuşı yıllar eçendä mäktäpne rayonda ğına tügel, ä respublikada iñ aldınğılar rätenä çığarğan İlfir Qotdusov. Bıltır bu mäktäp xätta Rusiä Prezidentınıñ 1 milllion sumlıq grantın da otqan. Ä İlfir äfände üze bik küp maqtawlı isemnärgä iä. Başqortstannıñ atqazanğan uqıtuçısı ul, Rusiä mäğärife otliçnigı da. Menä şundıy uñışlı eşläp kilüçe mäktäp direktorına Kuşnarenko rayon xakime Sergey Kasatkin 28 fevral' könne ber ay eçendä eştän buşatılaçağın belgertep xat cibärgän. “Älege ğämälneñ säbäplären añlatıp ta tormağan ul üzeneñ xatında, - di İlfir Qotdusov. - Böten säbäp, älbättä inde, minem turı süzle buluımda, rayon xakimeneñ xataların yarıp äytüemdä”.
Şulay itep, Kuşnarenko rayonında tağın xällär kiskenläşä. Tağın da dip äytüneñ säbäbe şunda – biredä elekke xakimne dä urındağı xalıqnıñ rizasızlıq çaralarınnan soñ, törle mitinglardan soñ, wazıyfasınnan buşatqannar ide. İlfir Qotdusov fikerençä, ägär rayon citäkçesen urındağı xalıqnıñ fikeren sanğa suqmıyça, östän bilgeläw däwam itsä, mondıy xällär kiläçäktä dä däwam itäçäk. Şulay itep kiläse atnanıñ şimbäsendä Kuşnarenko rayonı üzägendä bik zur qarşılıq çarası ütäçäk. Andağı taläplärgä respublika citäkçelege iğtibar itärme-yuqmı, anısı soñraq bilgele bulır.
