Nihayät, çärşämbe könne Başqortstan Tatar ictimaği üzäge tiräsendäge xällärgä noqta quyıldı. Şuşı oyışmanı yabu öçen başlanğan häm ike yılğa yaqın suzılğan mäxkämä eşe tämamlandı. Başqortstan Yuğarı mäxkämäse Başqortstan Tatar ictimaği üzäge eşçänlegen tuqtatu turında soñğı qararın qabul itkän. Bu qarar 4 aprel' könne Başqortstan Tatar ictimaği üzägeneñ räise Ayrat Ğiniätullinnıñ qulına tapşırılğan.
Elegräk tä xäbär itelüençä, Başqortstan Tatar ictimaği üzägen yabu omtılışları 2005 yılnıñ may ayında başlanğan ide. Üzäkneñ räise Ayrat Ğiniätullin üz eşçänleklären tuqtatu öçen bernindi dä citdi säbäp bulmawın da äytä kilde. “Bezgä tağılğan ğayeplär, barı tik oyışmanı terkäw tärtibenä dä genä bäyle, şuña da ul citeşsezleklärne beterü öçen ber qıyınlıq ta yuq, läkin bu citeşsezleklärne beterü öçen forsat birelmi”, - dip belderä ide. Ayrat äfändeneñ süzlärençä, oyışmanı yabıp quyunıñ nigezendä barı tik säyäsi säbäplär genä yata. İctimaği üzäkne yañadan terkätmäw öçen barlıq çaralar qullanıldı, di ul.
Başqortstan Yuğarı mäxkämäseneñ Tatar ictimaği üzägen byaw turındağı qararına qarata menä nilär dide Ayrat Ğiniätullin:
“Bezgä tağılğan ğayeplär döres tügel. Bez yañadan terkäw öçen küpme tapqırlar dokumentlarnı birdek. Ämma alarnı törle säbäplär tabıp kire qaytara tordılar. Bez yañadan kassatsiä şiqayäte birep tormıybız. Çönki älege xakimiätlär utırğanda bu mömkin dä tügel. Üz eşçänlegebezne bez terkälmiçä dä däwam itä alabız. Bu qanun tarafınnan tıyılmıy”.
Şulay itep respublika tatar ictimaği üzäge üzen yañadan terkätä almadı. “Başqortstandağı küp kenä tatarlar Tatar ictimaği üzäk eşçänlegendä ozaq yıllar qatnaşa, şuña kürä dä alar bu eşne kiläçäktä dä däwam itäçäk, - di Ayrat äfände. – Barı tik räsmi xakimiätlär belän turıdan-turı söyläşü öçen räsmi wäqälätlär genä bulmıy. Xäyer, räsmi wäqälätläre bulğan başqa tatar oyışmaları belän dä respublika türäläre älläni sanlaşıp barmıy”.
Fänis Fätxi, Ufa
