Qazannıñ “Säydäş” mädäni üzägendä yıl sayın kitap bäyräme uzdırıla. Bıyıl da, ul “Kitap-2007”dip isemlängän baş astında 25 aprel' könne uzdı. Ğabdulla Tuqaynıñ tuğan könenä bağışlanğan çaralar arasında “Säydäş” mädäni üzägendä ütkän bäyrämgä dä kürenekle şağirlär , yazuçılar kildelär. Alar monda mäktäp balaları, hönäri mäktäplärdä uqığan yäşüsmerlär, yäşlär aldında üzläreneñ häm Ğ. Tuqaynıñ şiğerlären iskä aldılar, üzläre yazğan äsärlär turında söylädelär, balalarnı kitap uqırğa öndädelär.
Ä xäzer, xörmätle radio tıñlawçılar, sezneñ iğtibarığızğa kiçädän reportaj täqdim itäbez. Balalar belän oçraşuğa kilgän yazuçı Mädinä Malikova menä närsä dide.
“Bu bezneñ kitap köne. Näq menä şuşı Säydäş mädäniät üzägendä, yıl sayın balalarnı cıyıp bik matur itterep kitap bäyräme uzdırğan bu kollektivqa bik zur räxmätläremne belderäsem kilä. Bu, çınnan da Qazan şähäreneñ üzäge. Xäzer Qazannıñ üzägendä dä bik küplär tatarça söyläşälär. Mäktäplärdä dä bulabız , kitaplarnı da xäzer bik küp uqıylar. Balalar belän oçraşırğa kilsäñ, küñellär kütärelep kitä, kiläçäkkä ömet arta. Kitaplarıbıznı xalıq arasında taratuda, yäş balalarıbıznı kitap uqırğa künekterüdä bik zur eş başqarğanı öçen bik zur räxmät “Säydäş” mädäni üzäge xezmätkärlärenä”, – dide ul.
“Qazan utları ” jurnalınıñ proza bülege mödire, yazuçı Kamil Karimov fikere.
“Kem kitaptan ayırılmıy, şul kiläçäktä isän qalaçaq. Şuña kürä bez kitap söyüçelärne saqlap, cämğıätebezneñ kiläçägen saqlıybız”,- dide ul.
Kiçäne “ Tatarstan yäşläre” gäzite xezmätkäre Flürä Nizamova alıp bardı. Programmada “Säydäş” mädäni üzägenä yörüçe sälätle yäşlärneñ “Gölnaz” häm “Yalqın” vokal' ansambl'läre, “Yoldız”balalar ansamble häm “Säydäş” biyü teatrı çığış yasadı.
Kiçädä, kürenekle şağir Rädif Ğataşnıñ çığışı bik yalqınlı yañğıradı. Ul, Ğ. Tuqaynıñ bik ozaq yıllar buyı däresleklärgä kermägän, “Tayan Allağa” digän ber şiğeren uqıdı. Xäzer annan ber özek tıñlağız
Äy, söyekle , äy, bahäle, Äy, qäderle, yäş bala! Räxime bik zur anıñ, Här adäm tayan sin, Allağa!
“Kitap -2007”dip isemlängän bu muzıkal' ädäbi kiçädä, İdel- Press xezmätkärläre , Tatarstanda basılıp çıqqan tatar yazuçıları kitapların, bik küp kitap uquçılarğa büläk ittelär. “Qazan utları” jurnalı xezmätkärläre 2006 yılğı basmaların büläk ittelär. Bu çaradan ber bala da kitapsız qaytıp kitmäde.
Mälikä Basıyr