Accessibility links

Кайнар хәбәр

Ufada tatar matbuğatı wäkilläre cıyın ütkärde


Comğa könne Başqortstandağı tatar telendä çığuçı waqıtlı matbuğat basmaları wäkilläre Ufağa zur seminar-kiñäşmägä cıyıldı. “Başqortstan tatar waqıtlı matbuğatı basmaları. Problemalar häm üseş perspektivaları” dip atala bu kiñäşmä.

Bıyıl dürtençe tapqır oyıştırılğan şuşı cıyınğa Ufada näşer itelüçe gazetalar häm jurnallar icat köçläre, şulay uq respublika rayonnarında häm şähärlärendä çığuçı basmalar wäkilläre kilde. Gazetalar häm jurnallar möxärrirläre, alarnıñ urınbasarları, tanılğan jurnalistlar häm tärcemäçelär üzara täcribä urtaqlaşu sabaqlarına qayber yaña täqdimnäre, teläkläre belän kilgän. Bu kiñäşmägä Başqortstan “Kitap” däwlät näşriätınıñ tatar telle basmalar seksiäse xezmätkärläre dä çaqırılğan.

Älbättä inde, älege kiñäşmägä respublikanıñ matbuğat öçen cawaplı şäxesläre dä kilde. Çönki bu cıyınnı oyıştıru başlanğıçı belän Başqortstan Respublikası Xökümäte qarşındağı Matbuğat, näşriät häm poligrafiä idäräse çıqqan. Annan da wäkillär bar ide bügenge kiñäşmädä. Eşlekle söyläşüne dä şuşı idäräneñ başlığı urınbasarı Fänil Kodakaev açtı häm alıp bardı. Fänil äfände respublikada tatar basmalarınıñ eşçänlegenä ğomumän alğanda uñay bäya birde. “Alarnıñ eçtälege dä, tışqı bizäleşe dä zaman taläplärenä yaraqlaşıp, yaxşı yaqqa üzgärä, - dide ul. - Şuña kürä alarnıñ tirajları da başqalarnıqına qarağanda totrıqlı, älläni artmasa da, ber külämdä tora”.

Kiñäşmäneñ berençe öleşendä “Qızıl tañ” gäzite baş möxärrire Fail Fätxetdinov, “Tulpar” tatar yäşlär jurnalı möxärrire Ramil Miñneäxmätov, “Ömet” tatar yäşläre gäzite baş möxärrire Rädis Nogmanovlar çığış yasadı. Alar härberse tatar waqıtlı matbuğat basmaların tağın da uqımışlıraq häm qızıqlıraq itü öçen baytaq qına täqdimnären dä yañğırattı.

“Ömet” gäzite Başqortstanda çığuçı tatar basmaları arasında ğına tügel, ä bar Rusiä külämendäge tatar gazetaları belän çağıştırğanda da iñ uñışlı eşläwçelärdän. Anıñ tirajı da iñ zurısı. Monıñ säbäben “Azatlıq” xäbärçese belän äñgämädä anıñ baş möxärrire Rädis Nogmanov uquçılar belän bäyläneşneñ yaxşı buluında dip añlattı.

Başqortstandağı tatar gazetaları belän jurnallarınıñ hämmäse dä diärlek räsmi xakimiätlär aqçasına näşer itelä. Şuña da alarda kübräk respublika citäkçelegeneñ eşçänlege turındağı yazmalar, törle räsmi qararlar, dokumentlar urın ala. Tege yäki bu çaralar, räsmi yubileylar xaqında gazetalarda maxsus bitlär birelä. Misal öçen, bıyıl här räsmi basmada san sayın 450 yıllıq yubileyğa bağışlanğan mäqälälär küp basıla. Alarnıñ baytağı uquçılar iğtibarın bik cälep tä itmi, çönki qızıqsız.

Başqortstandağı bügenge tatar matbuğatı xäle xaqında fikerlären beleşü öçen, bez aqsaqal jurnalist, ozaq yıllar “Qızıl tañ” gäzitendä eşläp layıqlı yalğa çıqqan tanılğan tatar şağire Färit Gabderäximgä möräcäğät ittek.

“Başqortstandağı bügenge tatar matbuğatın uqırlıq tügel, - di Färit Gabderäxim. – Anda tatar xalqınıñ ixtıäcları, anıñ milli problemaları bötenläy kütärelmi. Respublikada küpme tatar milli oyışmaları eşläp kilä. Alar bit törle problemalarnı kütärälär, ä menä şular xaqında läm-mim “Qızıl tañ” gäzitendä dä, “Ömet” tä dä. Gel maqtaw da maqtaw, xakimiätlärne maqtawdan arı kitmilär”.

Färit Gabderäximneñ süzlärençä, gäzit-jurnallarnıñ qızıqsız buluında alarda eşläwçe jurnalistlar ğayıple tügel. “Kemneñ arbasına utırsañ şunıñ cırın cırlıysıñ, - di äñgämädäşem. – İcat köçläre isä östän quşqannı ğına yazıp, üzläreneñ talantların açarday yazmalarnı äzerli dä almıy”.

Fänis Fätxi, Ufa

XS
SM
MD
LG