Çallıdağı möselman xatın - qızların berläşterü maqsatınnan berençe cıyın monnan 2 ay elek ütkärelgän ide.Şuşı cämğiät xäzer Çallı möxtäsibäte qarşında " Möslimälär Şurası" bulıp terkälü uzdı häm eşçänleklären canlandıru maqsatınnan yäkşämbe könne ikençe cıyılışların uzdırdılar.Biredä törle yünäleştä eşläyäçäk komitetlar buldırıldı häm alarnıñ cawaplı keşeläre dä bilgelände.Çallıda turıdan turı üzläre zıyan kürgän, mısqıllawğa duçar bulğan möselman xatın-qızları yäki törle oyışmalarda qatnaşuda ğayıplänep qulğa alınğan möselman ir-yegetläreneñ äniläre, apa-señelläre dä yäşi.Zakonsıyz qulğa alınğannar dip sanaluçılar belän eşläw buyınça da, yäğni andıylarnıñ xoquqların yaqlaw yünäleşendä dä xäräkät itü bulaçaq.Mondıy komitet äle oyıştı ğına häm başqarası eşläre farazlanıp qına kilä."Möslimälär Şurası"nıñ bügenge mäşäqätlärenä tuqtalıyq.Tatar xatın qızları şura eşendä aktivlıq kürsätäme, möselman xatın-qızların nindi mäs'älälär borçıy?Şuşılar xaqında "Möslimälär Şurası" räise Rimma Nuriäxmätova häm älege oyışmanıñ psixoloğı Ğaliä Kaşapova "Azatlıq"qa bolay didelär:
-Bu arada bez Şuranıñ cawaplı keşelären bilgeläw belän mäşgül'bez.Bik küp xatın qızlar belän oçraşaçaqbız.Şunı beldem, Çallı xatın-qızları bik aktiv ikän.Alar belän aldıbızğa plan quydıq, şunı ütäw öçen cıyılıp söyläşäbez.Sorawlar bik küp ikän.Xatın-qızlarıbız yärdäm sorıy.Şunı isäpkä alıp, psixolog Ğaliä xanımnı üz eşebezgä cälep ittek.
-Xäzerge zamanda xatın-qız haman da üzeneñ problemaların çişä almawçı, matdi baylıqqa iä bula almawçı, yuğarı urınnarda eşli almawçı keşe bulıp qala.Çönki bezdä il belän idärä itüçelär, däräcäle känäfilärdä utıruçılar irlär.Bez yärdämgä bik tä moxtac, şul isäptän psixologik yärdämgä dä.Psixolog bularaq alarğa belemle, qorıç ixtiarlı bulırğa, balaların saf möselman itep tärbiäläw yulında yärdäm kürsätäsem kilä.Ğaylä probleması şähärdä bik zur, bigräk tä yäşlär arasında.Bez irlärebez belän yäşärgä öyrätelmägän buın üsterep kiläbez.Ğomumän bez ğailädä yäşi belmibez.İrlärebezne qäderlämibez, xatın-qız bularaq üzebezne tota belmibez, tieşle tärbiä almağanbız, şuña kürä minem maqsatım xatın-qızğa ürnäk keşe, ürnäk ana buluda yärdäm kürsätü.
Çallı möxtäsibäte qarşında oyışqan "Möslimälär Şurası" cıyılışında möselman qızların häm yegetlären qawıştıru xezmäten buldıru turında da qarar qabul itelde.Moña ixtiac bar.Çönki möselman ğailäse qorırğa teläüçe yäşlär şundıy üteneç belän şähär mäçetlärenä kilälär ikän.
Ğafiulla Ğaziz, Çallı
