Accessibility links

Кайнар хәбәр

Kommunistlar 1 maynı iğtibarsız qaldırmadı


KPRF firqäse äğzäläre üz cıyının irtänge 10da Qamal teatrı qarşında başlap cibärde. Uramda salqın cil buluğa qaramastan, çal çäçle äbi-babaylar bu çaranıñ axırına qädär basıp tordılar. Mitingta 600ләп keşe qatnaştı, anda yäşlär bik az ide. Kommunistlar ğädättägeçä xakimiätkä, anıñ ğämällärenä qarşılıq belderep çığışlar yasadılar häm şiğar'lär kütärdelär. Alarnı fabrika-zavodlar yabılu, eşsezlek borçıy. Xäyer, eşe bulsa da xalıq barıber xäyerçelektä integä, di KPRF äğzäläre:

Fabrika-zavodlarda, mäktäp, xastaxanälärdä eşlägän xatın-qızlarnıñ xezmät xaqı yäşäw minimumınnan tübän. İr-atlarnıñ xezmät xaqı az ğına kübräk, şulay da ğailäne tuyındırırlıq tügel! Alarğa üz xatınnarı, balaları aldında oyat!

Qazanda yäşäwçe Nail Niğmätullin mitingqa üzeneñ balaları, onıqların qayğırtıp kilgän. Xalıqnı talawğa tınıç qına qarap utıra almıym, dip Nail äfände.

Kommunistlar firqäse äğzäse Näsimä Stolyarova “Berdäm Rusiä” firqäseneñ 1 mayda uramnarğa çığıp, xalıq mänfägat'lären yaqlarğa tırışuın ikeyözlelek dip atadı:

Berdäm rusiälelär Däwlät Dumasında 75%nı täşkil itälär, Däwlät Şurasında 90%! Nigä alarğa uramğa çığıp, qıçqırıp yörergä? Yun'le zakon çığarıp, xalıqnıñ xälen yaxşırtsınnar!

1 may könne Ğor'ki parkında tağın ber miting ütte. Älege çaranı Bötenrusiä xatın-qızlar berlegeneñ Tatarstan bülekçäse oyıştırdı. Ä çınlıqta isä bu KPRF firqäse cıyınınıñ däwamı bulıp çıqtı. Anda töp iğtibar xatın-qızlarğa ğına birelmäde. Şulay da xalıqnı borçığan töp problemalar xatın-qızlar öçen dä, ir-atlar öçen dä urtaq diärgä bula. Qazanda yäşäwçe Miñlebikä Kotdusovanı tıñlap kitik:

Ni öçen monda çıqtıq? Çönki tormışıbız bik awır. Pensiälär bik keçkenä, fatirğa tüläwlär isä üskännän üsä genä bara. Xälebez az ğına bulsa da yaxşırmasmı dip ömetlänep yöribez inde. Min Qazanda 37 yıl däwamında ştukatur bulıp eşlädem. Şähärdäge bik küp binalarda minem xezmät bar. Bügen isä beräwgä dä kiräk tügel min.

1 may mitingın kommunistlar İrek mäydanındağı çığışları belän tämamladı.

Al'bina Zäynulla

XS
SM
MD
LG