Accessibility links

Кайнар хәбәр

“Azatlıq” nı kem niçek teli, şulay tıñlıy ala


3 may - Bötendönya matbuğat irege köne. İldäge küp kenä redaksiälär häm näşriätlär qatğıy senzura basımı astında eşli. Jurnalistlarğa, näşer itüçelärgä höcüm itälär, xätta üterälär. Älege kön cämäğätçelekkä matbuğat iregeneñ bozıluı turında, xökümätkä matbuğat iregen tä'min itü kiräklegen iskä töşerep torırğa mömkinlek birä.

“Azatlıq”nıñ Qazan studiäsenä kilgän xatlarğa qarağanda, tıñlawçılarıbız soñğı waqıtta radionıñ irege qısıla dip zarlana. Äytik, şuşı könnärdä genä Çistay rayonında yäşäwçe Läysän Sabirovadan xat kilde. Radionı yaqın itep ul sin dip däşä. Xatnıñ eçtälege mondıy. “Bik zur räxmät sina, barı tik sin genä bezgä çit ildäge xälne “qara buyausız” citkerep tordıñ. Sineñ arqılı bez Tatarstan xalqı, çit ildä yäşäwçe tatarlarnıñ tormışı turında mäğlümat ala idek. Sin bezne Auropa belän totaştırıp toruçı berdän-ber radio buldıñ. Çit illärneñ Rusiägä mönäsäbäten dä bez barı tik sineñ yärdämeñ belän işetep beldek. Meñ-meñ räxmät sina!

Tik Mäskäw bezneñ elemtäne kisärgä buldı axrısı. Nik digändä bez sine işetmibez dä diärgä bula. Saylap alınğan xäbärlärne genä Yaña ğasır arqılı işetäbez. İmeş iñ qızığı, iñ kiräkle xäbärlärne. Ä min moña ışanmıym. “Azatlıq”nıñ otbornıy xäbärläre bezgä kilep citä mikän? Niçek kenä bulmasın, bez Qızıl Yalan awılı yäşläre, sineñ belän “Azatlıq”, kiräk bulsa sineñ öçen köräşergä dä äzer. Bezne taşlama” dip tämamlana xat. Xörmätle tıñlawçılarıbız, bilgele bulğança 1 marttan başlap “Yaña ğasır” da “Azatlıq” tapşırularınıñ retranslyatsiäse yabıldı. Anı tuqtatu turında qararnı “Yaña ğasır” kanalı citäkçeläre qabul itte. Alar monı radio tapşırularnı tikşerep toruçı federal' agentlıq tarafınnan litsenziälärne tärtipkä kiterü taläbe belän añlattı. İke radio arasında barğan söyläşülär näticäsendä, “Azatlıq” üzeneñ ber säğätlek töp tapşıruında yañğırağan iñ aktual', qızıqlı bulğan yazmalarnı tuplap “Yaña ğasır” öçen maxsus tapşıru äzerli başladı. Anda yañğırıy torğan yazmalarnı “Azatlıq” radiosı üze saylap ala.

Şulay uq berniçä kön elek kenä Tömän ölkäsennän Minzat İbätullinn isemennän xat kilde. Xatta Minzat äfände “Säğätlärne cäyge waqıtqa küçergäç, “Azatlıq” radiosınıñ yışlıqları qabat üzgärde, dip borçıla. “Azatlıq” tapşıruların 25 metrlı qısqa dulqında tıñlawı bik qıyın. Ber dulqında öç radiostansiä ber – bersenä totaşa. Qış könnärendä bik yaxşı işetelä ide. Bu xällär yıl da qabatlana. Ägär dä “Azatlıq” härwaqıt ber ük yışlıqlarda qalsa yaxşıraq bulır ide. Ä bez Seberdä yäşäwçelär “Azatlıq” radiosın qısqa dulqınnardan ğäyre tıñlıy almıybız. Çönki bezdä cirle radio dulqınnarı aşa retranslyatsiä köylänmägän häm İnternet aşa tıñlaw mömkinlege dä yuq. Zinhar çarasın küregez, alaysa sezneñ radionı tıñlawdan waz kiçäm!”.

Xörmätle tıñlawçılar, Mondıy xatlar “Azatlıq” nıñ Qazan bülegenä yış qına kilep tora, şaltıratuçılar da küp. “Azatlıq” nı tıñlarğa teläüçelär küp, ä mömkinleklär azraq, çönki teläsä kem ciñel genä qısqa dulqınlı yışlıqlarğa radioalgıçın köyli almıy. Läkin barıber qısqa dulqınnar iñ universal' häm ışanıçlı ısul bulıp qala.

Minzat äfändeneñ yışlıqlar alışmıyça daimi ber ük dulqında qaluı kiräklege turında äytüe bik döres, ämma texnik säbäplär arqasında qısqa dulqınnar qışqı häm cäyge waqıtqa küçkändä alışıp tora. Bu tıñlawçılarnı yuğaltuğa kitersä dä berni eşläp bulmıy. Dimäk, yazın häm közen yaña yışlıqlarnı iğtibar belän yazıp alıp tieşle waqıtta alarnı tıñlarğa turı kilä.

Qabat isegezgä töşeräbez, “Azatlıq” radiosınıñ tapşıruların kön sayın berniçä yul belän tıñlap bula. Täwlegenä 4 tapqır qabatlana torğan 1 säğätlek tulı tapşırunı qısqa dulqınnar aşa dönyanıñ törle illärendä tıñlıy alasız. Alarnıñ yışlıqları efirda yış äytelep tora.

Şulay uq “Yaña ğasır” radio kanalında 20 minut däwamında tapşırunıñ maxsus çığarılışın tıñlıy alasız.

NTV+ sputnik tälinkäse aşa “Yaña ğasır” telekanalın qarawçılar da “Azatlıq” nıñ şul uq maxsus çığarılışnı Rusiä töbäklärendä häm çiktäş illärdä televizor aşa aşa tıñlıy alalar.

İnternetqa çığarğa mömkinlege buluçılar www.azatliq.org säxifäsennän teläsä qaysı waqıtta “Azatlıq”nı işetä ala. Tapşıruda yañğırağan yazmalarnıñ tekstları şul uq könne İnternet säxifäsenä quyıla.

Gölnaz Şäyxetdin

XS
SM
MD
LG