22-nçe Mayda başqala Ankaranıñ üzәk maydannarınnan Ulusta alış-bireş kibetlәre urnaşqan cirdә canlı ber bomba üz üzen şartlatıp 6 keşeneñ hәlaq buluına, 5-6-sı awır dәrәcәdә yөz tirәsendә keşeneñ cәrәxәtlәnüenә sәbәp buldı. Yaqın Kөnçığışta Ğıyraq, Livan, Fәlәstindә bombalar şartlawı, keşelәrneñ ülüwe ğәdәti küreneşkә әwerelsә dә,Tөrkiәneñ stabillığı şul dәrәcәdә qaqşadı dip әytü өçen sәbәp yuq. Çөnki Tөrkiәneñ kөçle armiәse, armiәgә totaşqan eçke imenlek өçen cawaplı jandarmeriәse hәm polistiәse bar. İldә ekonomik yaqtan da stabilllıq bar. Şulay da teror aktları soñğı waqıtlarda arta başladı. Monnan elek tә İstanbulnıñ Taksim maydanında ber xatın-qız өstendә şartlarğa әzer bombalar belәn qulğa elәkkәn ide. Ütkәn atnalarda ğına İzmirneñ ber bazarında bomba şartlap ber keşe hәläk bulğan 10 tirәsendә keşe cәrәxәtlәngәn ide. Televiziә belәn gazetalarda şundıy bombalar qulğa elәkkәn buluwı turında xәbәrlәr çığuwına keşelәr inde şaqqatmıy başladılar. Şulay uq kөnyaq kөnçığışta Ğıyraq qa citkәş rayonnarda yәş kenә soldatlar, tübәn dәrәcәle yәş ofitserlar yaki saqlıq kөçlәre yә minalarğa basıp, yә isә idәn astı PKK partizannarınıñ açqan utları belәn şәhit itelülәre turındağı xәbәrlәr dә atnasına iñ kimendә ber niçә mәrtәbә kilep tora. Inde Ankaradağı faciğәdәn soñ İstanbul belәn Adanada da ike canlı bomba xatın-qız qulğa elәkte. Adanadağı xatında11 kilogramma A-4 tibındağı şartlağıç tabıldı. Adana valisi bu qulğa elәkkәn өçençe bomba dip belderde. Qısqası barlıq imenlek kөçlәre alarm vazğiәtendә. Generalştab başlığı armiә generalı Yaşar Büyükanitnıñ mondıy hөcümnәrne zur şәhәrlәrdә kөtәrgә kirәk dip belderüe xalıqnı tağın da tınıçsızlandırdı.
Tөrkiәdә terroristik aktlar inde niçә yıldan birle dәwam itә. Şuşı çaralarnıñ maqsatı xalıqnı qurqutu, çit ile keşelәren, turistlarnı өrketü, şulay itep ekonomik tormışqa tiskәre yoğıntı yasaw, xәrbilәrne, radikal kөçlәrne qotırtıp demokratik sistemanı cimerügә yul açu dip әytergә bula. Tabiği monı oyıştırğannar da niçә un yıldan birle Tөrek imenlek kөçlәre belәn qorallı kөrәş alıp barğan PKK. Generalştab başlığı Büyükanıt, xөkümәt bezgә quşsa bez tөnyaq Ğıyraqta oyalanğan PKK xәrbi bazaların tar mar itәr idek dip beldergәn ide. Lәkin xөkümәt AQŞ xәrbi kөçlәreneñ kontrole astındağı Tөnyaq Ğıyraqqa xәrbi kөçlәr cibәrü mәsәlәsen xuplamıyça kilde. Şunıñ өçen AQŞ-Tөrkiә hәm Ğıyraq xөkümәtlәreneñ wәkillәrennәn oyışqan ber koordinasyon wәkilçelek oyıştırıldı. AQŞ yağınnan pensiәdәge ber general, Tөrkiә yağında da şulay uq pensiәdәge ber general bar ide. Lәkin niçә aylarğa suzılğan oçraşu hәm sөylәşülәrdәn PKK-neñ xәrbi aktiflıqların tuqtauğa ireşelmәde. Tөrek yağınnan pensiәdәge armiә generalı Edip Başer bu eş barıp çıqmayaçaq, xөkümәt belәn min kileşmim, İyündә vazıyfamnan ayrılaçaqmın dip belderü yasağaç, Xөkümәt anı şunduq vazıyfasınnan aldı. Menә şuşı vaqiğәdәn ber kөn uzğaç uq Ankarada canlı bomba üzen şartlattı. Dimәk bezneñ general şik-şөphәlәrendә xaqlı bulıp çıqtı.
Inde Premier Erdoğan “armiә mindәn talәp itsә Tөnyaq Ğıyraqqa ütep kerep xәrbi operatsiә uzdırı mәsәlәsen parlamentqa kiterә alam” dip әytergә mәcbür buldı. Başqa süzlәr belәn әytkәndә PKK-nıñ Tөrkiәneñ zur şәhәrlәrendә şartlatqan bombaları, üzeneñ xәrbi bazalarında şartlatılaçaq bombalar bulıp kire qaytaçaq. Әmma şuşı Ankarada şartlağan bomba Tөrkiәneñ stabillığına orım yasadı, xalıq tınıçsız.
Әxtәm İbrahim, İstanbul