Accessibility links

Ufada Qor’än söyläwçelär bäygese ütä


Ufada balalar häm üsmerlär arasında Qor’änne osta itep uquçılarnıñ XI respublika bäygeseneñ final öleşe bu şimbädä ütäçäk. Bäygeçelär başqalanıñ Märyäm Soltanova isemendäge mädräsäsendä köç sınaşa. Respublikanıñ barlıq diärlek töbäklärennän 200 dän artıq bala qatnaşaçaq anda.



Bıltır da bu üzençälekle bäygedä 200 dän artıq imanlı bala qatnaşıp üz ostalığın sınap qarağan ide bu yarışmada. Märyäm Soltanova isemendäge mädräsäneñ rektorı, “Risalät” gazetası baş möxärrire İldar xäzrät Malaxov äytüençä, balalar arasında dinebez islam nigezlären öyränüçelär, Qoränne yatlawçılar artqannan-arta bara. “Ä inde alar arasında şundıy konkurslar da oyıştıru alarnıñ şul alğan belemnärenä üzençä ber imtixan ütkärü kebek bula”, - di ul.

Märyäm Soltanova isemendäge mädräsä rektorı İldar xäzrät Malaxov süzlärençä, qor’änne sänğät'le söyläw bäygesendä tatarlar belän başqortlardan tış, respublikada yäşäwçe başqa din qärdäşlär dä – dağstanlılar, azerbaycannar, qazaqlar, çeçennar häm başqa millätlär wäkilläre dä ixlas qatnaşa.



İldar Malaxov äytüençä, bu bäygedä ciñgän keşelärne zur büläklär kötä. Ä iñ qäderle büläk, här yıldağıça, – komp'yuter, di ul.

Qoränne sänğät'le söyläwçelär bäygesenä Başqortstan möselmannarı diniä näzaratı räise, möfti Nurmöxämmät Niğmätullin räislegendäge jyuri bäya biräçäk. Anda Mısırdan kilep uqıtuçı ğäräp möğallimnäre dä qatnaşa.

Fänis Fätxi, Ufa

XS
SM
MD
LG