Xätta legendar bäyräm, Qazannıñ meñellığı da elekke Kirov xäzerge Mäskäw uramın tözekländerä almadı. Yubiley dip zur-zur gipermarketlar, küñel açu üzäkläre, qısqası ni genä tözelmäde, üzäk uram Bawmannıñ däwamı itep Sankt Peterburg uramı da barlıqqa kilde. Mäskäw uramına haman da qul citmäde. Baqsañ bu iğtibarğa layıqlı häm tatarlar öçen bik möhim uram. Monda Tuqay yäşägän Amur kunakxanäse, Fuqs kunakxanäse häm tatar tarixı belän bäyle küp kenä binalar urnaşqan. Tatarstan başqalasında dönyawi milli xäzinälärne saqlıybız dip qorıltay östenä qorıltay ütkärelep tora, ul waqıtta Mäskäw uramına iğtibar itüçe äle haman da yuq. Eşneñ öçı qırıyı şunda ki, başqalanıñ meñellığı waqıtında Qazan belän Mäskäw xakimiätläre arasında Mäskäw uramın urtaq köçlär belän tözekländerergä digän kileşü tözelgän. Söyläşülär buluın bulğan, eşe genä kürenmi.
Mäskäw uramı turında äle küp yıllar iskä töşermäslär ide, ägär Sergey Mitroxin bulmasa. Mäskäw şähäre şurası deputatı, Qazanda yörgändä bu uramnı kürep, Mäskäw öçen üpkä xise kiçerep qaytqan, häm şul säbäple, Mäskäw merına bu uramnıñ tözekländerelüe turında soraw birgän. Luckov äfände üz çiratında, uramnıñ äle dä tözeklänmäwendä Qazan xakimiäten ğayıple sanıy. “Kileşü buyınça Qazan xakimiäte Mäskäw uramın 3 öleşkä bülep, konkurs oyıştırıp bu eşkä mäskäw investorların cälep itärgä tieşlär ide, ämma bügenge köngä qädär Qazannan xäbär-xäter işetelmäde” di Luckov cawap xatında.
Qazan xakimiäte matbuğat üzägendä beldergänçä, Qazan yağı bu mäs'älä başqaça xäl itelergä tieş dip sanıy. Bu cirlärne investorlarğa tapşırğançı anda beraz tözekländerü eşlären başqarırğa kiräk. Bu proyektnıñ berniqädär öleşen Mäskäwneñ byudjet aqçaları qaplarğa tieş, ämma Mäskäwneñ şähär tözeleşe departamentında beldergänçä, byudjetta monıñ buyınça aqçalar qaralmağan, uram fäqät investorlar xisabına tözekländerelergä tieş.
Älegä Mäskäw uramında “Moskovskoe” şirkäte üzäk uramnı proektlaştıyru eşlären alıp bara. İnde bötenläy yörep bulmıy başlağaç, yaña yul da salıp quydıla. Proyekt tögällänmiçä, cirlärne investorlarğa birü mömkinlege bulmıy. Tözekländerü öçen barlığı 7 million sum sarıf iteläçäk. Qazan xakimiätendä beldergänçä, ala Mäskäwlelär belän urtaq eşlär başqarırğa härçaq riza. Şunı äytergä kiräk, İke başqala arasındağı kileşü inde 2006 yılda uq üz köçennän çıqqan, şuña kürä dä belgeçlär fikerençä, Mäskäw uramnarın tözekländerü, möğayın cirle investorlarğa qalır.
Ğädel Galämetdinov
