Accessibility links

Кайнар хәбәр

Tatarstanda Soğıt Ğäräbstanı mädäniäte könnäre başlandı


7 nçe iyün könne Qazannıñ Korston küñel açu üzägenä cıyılğannar Tatarstan xökümäte urınbasarı mädäniät ministrı Zilä Wälieva, Soğıt Gäräbstanı mäğlümat çaraları häm mädäniät ministrı İyäd bin Ämin Mädäni täbrikläwlärennän soñ ğäräp fol'klor iyüllären qaradı, xalıq uyın qoralları köylären tıñladı.

8 nçe iyündä isä “Xäzinä” milli sänğät galereyasendä Mäkkä häm Mädinä şähärläreneñ izge urınnarına, sınlı sänğät äsärlärenä, şämaillärgä häm xörmä pal'masına bağışlanğan kürgäzmälär açıldı. Kiçen Korston qunaqxanäsenä cıyılğannar ğäräplärneñ tuy külmäklären kürä aldı. Soğıt Ğäräbstanı mädäniäte könnäre qısalarında Qazan däwlät universitetında Soğıt Ğäräbstanı häm Rusiä arasında iqtisadıy bäyläneşlär, Soğıt Ğäräbstanı mädäniätenä bağışlanğan leksiälär dä uqıldı.

Soğıt Ğäräbstanı mädäniäte könnären açıp Zilä Wälieva:

Bu oçraşular häm mädäni bağlanışlar başqa tarmaqlarda da ike ara bäyläneşlärne nığıtu öçen citdi teräk bulıp tora”,-dide.

Anıñ äytüençä, Rusiäneñ Ğäräp dönyası belän bäyläneşen üsterüdä Tatarstannıñ role zur. Soğıt Ğäräbstanı mäğlümat çaraları häm mädäniät ministrı İyäd bin Ämin Mädäni sälämlägäç, Tatarstan prezidentı Mintimer Şäymievneñ dä cılı qabul itüen äytep uzdı. Rusiä belän Soğıt Ğäräbstanı arasındağı mönäsäbätlärneñ çınlap torıp nığıy başlawına mönäsäbättä ul 2004 nçe yılda patşa Abdulla bin Äbdelğäziz Äl Saudnıñ monnan 4 yıl elek Rusiägä kilüen, 3 ay elek Putinnıñ Soğıt Ğäräbstanına baruın äytep uzdı.

Tatarstan prezidentına Feysal patşa xalıqara bülägen birü bezneñ xörmätebez buldı, dide İyäd bin Ämin Mädäni. “Üzegezne öyegezdä kebek xis itegez!” dip tämamladı ul süzen. Ä çınlıqta isä, Piramida küñel açu üzägenä cıyılğannar üzlären ike säğätkä genä bulsa da Soğıt Ğäräbstanı mädäniäte dönyasında kebek xis itte. Mondıy moxit tusın öçen ğäräplär üz illärennän alıp kilgän çäy täm tomnarın, çın ğäräp kähwäasen peşerep öläşte. Ä säxnädä Tuy biyüe başlanıp kitte. Bu kiäwgä uñışlar teläp şiğerlär häm cırlar belän bergä başqarılğan biyü bigräk tä Mäkkä, Mädinä şähärlärenä xas ikän. Bu şähärlärne belmägän tatar keşese yuqtır. Ğomümän ğäräp dönyası tatar öye öçen ber qayçan da yat tügel. Şämailsez öyne, xörmä cimeşennän başqa urazanı, anıñ töşennän tezelgän täsbix-disbene totmağan ölkänne elek küz aldına kiterep bulmağan. Mäkkä, Mädinä şähärlärendä bulıp, xac qılıp qaytqannar ğömer-ğomergä iñ abruylı häm uqımışlı bulıp sanalğan. Alar üzläre belän İdel buyına ğäräp mädäniäten dä alıp kilgän. Soğıt Ğäräbstanı tuğrasında, yäğni gerbında yasalğan xörmä pal'masına bu ildä yäşäwçelär bez cir ananı olılağan kebek, nazlı ana dip atap baş iä. Yafraqları belän essedän saqlıy häm cimeşläre belän tuqlandırıp tora ul. Tatarstandağı Soğıt Ğäräbstanı mädäniäte könnärendä açılğan kürgäzmälärneñ berse näq menä şuşı ağaçqa bağışlanğan ide. Annan da qala, Xäzinä sänğät galereyasenä barğannar, Mädinä –i- Mäkkäneñ izge urınnarın, şamaillärneñ törlelegen, üzençälekle räsemnär häm sänğät belän ürelgän foto surätlärne dikqat belän qaradı. İnde ğäräp xatın-qızlarınıñ kiemnärenä kilgändä isä, bügen alarnı küplär baştan ayaq qarağa törengän itep kenä küz aldına kiterä. Ä menä tuy külmäkläre kürsätkän tamaşanı qarağannar ğäräp kiemnäreneñ böten maturlığına soqlandı. Ul ğına da tügel, Soğıt Ğäräbstanınıñ 5 wiläyätkä bülengänlegen dä belä aldılar. Soğıt Ğäräbstanı patşalığı tözelgängä qädär küp törle, şul uq waqıtta ruxı häm matdi üzençäleklär belän kön kürgän bu wiläyätlärneñ mädäni bizäkläre bügenge tuy külmäklärendä dä çağılış tapqan. Tatarstanğa Soğıt Ğäräbstanı mädäniäte könnärenä kilgän qunaqlarnı 9 nçı iyün könne Bolğarğa, ä 10 sında Teläçe awılı Sabantuyına alıp baralar.

Nail Alan

XS
SM
MD
LG