Accessibility links

Dinnär tarixın uqıta alırlıq belgeçlär äzer


Kiläçäktä Tatarstanda häm Rusiä töbäklärendä däwlät ürnägendäge diplomğa iä bulğan dinnär belgeçläre, dinnär tarixı, teologiä buyınça ekspertlar eşliäçäk. Comğa könne Rusiä İslam universitetında Teologiä häm İslam fännäre fakul'tetları studentlarınıñ çığarılış kiçäse buldı. Alar mäktäplärdä, urta hönäri belem birü häm yuğarı uqu yortlarında eşläw xoquqına iä. Läkin bügenge köndä belem birü oyışmalarına alarnıñ kiräge bar mikän, busı soraw bulıp qala. Universitetnı tämamlap çıqqan 25 şäkert tä şunı añlap bulsa kiräk, üzläreneñ kiläçägen hiç kenä dä mäktäplärdä belem birü belän küzallamıy. Rusiädä bulğan İslam yuğarı uqu yortları arasında Teologiä fakul'tetın tämamlap çığuçılar Qazanda äle berençe. Şuñadır monda Başqortstannan da, Çeçnyadan da, Qazaqstannan da studentlar uqıdı. Alar 4 yıl buyı belem aldı. Teologiä fakul'tetında törle dinnär belgeçläre äzerlänä. İslam, xristian häm başqa din nigezläre buyınça belem birä alaçaq alar bu şäkertlär. Studentlarnıñ çığarılış kiçäsendä Tatarstan möselmannarı Diniä näzaräte citäkçese Ğosman xäzrät İsxaqi da, Rusiä islam universitetı rektorı Rafiq Möxämmätşin häm başqa qunaqlar da studentlarğa uñışlar teläde. Bilgele bulğança, küptän tügel Dinnär tarixı däreslege äzerlängän ide. Anı uqıtırğa belgeçlär yuq dip belderelde. Älege şäkertlär bu eşkä yaraqsız bulıp çığa mikän bilgesez. “Azatlıq” radiosı xäbärçese studentlardan kiläçäktä närsä belän şöğellänäçäge turında qızıqsındı:

Min Törkiägä ike yılğa uqırğa baram, anda belem arttırıp qaytırğa isäplim. Bälki qalıp ta bulır äle, çönki anda tatarlar da yäşi. Min anda 10 köngä barğan idem alar belän dä tanıştım.

Min Sarıtawnıñ Cämiğ mäçetendä uqıtam inde.

Min möselmannar öçen beleşmä telefon xezmätendä eşlärgä uylıy.

Älegä qayda eşläyäçägemne tögäl äytä almıym, tizdän KDU nıñ tarix fakul'tetın da tämamlıy.

Min sport belän dä şöğellänäm. Möğayın şul yuldan kitärmen.

Studentlarnıñ bişese uquların Törkiäneñ Ankara şähärendä universitetnıñ teologiä bülegendä däwam itärgä farazlıy. Alarnı ike yıl buyı Ankara ğalime İdris bäy Şöngül uqıtqan. Comğa könne şäkertlärne ul häm Baxrain patşalığı ğalime Omar Abdelaziz da qotladılar.

Landış Xararsova

XS
SM
MD
LG