Accessibility links

Кайнар хәбәр

Ukrainadağı parlament saylawlarında ike yaq ta ciñü iğlan itte


Ukrainadağı parlament saylawları ilne yañadan säyäsi körçekkä kiterergä oxşap tora. Ber bersennän az ğına ayırma belän iñ küp tawış cıyğan 2 firqä dä ciñü iğlan itte häm ber-bersen saylaw näticälären üzgärtüdä ğäyepläde.

Ukraina üzäk saylaw komissiäse xäbär itüençä, tawışlarnıñ 96 protsentın sanaw näticälärenä qarağanda Rusiä yaqlı premyer ministr Viktor Yanukoviçnıñ Regionnar firqäse 34 protsent tawış belän berençe urında bara.

Ikençe urındağı Könbatışqa yöz totuçı Yulia Timoşenko blogı 31 protsent çaması tawış cıyğan.

Prezident Viktor Yuşçenko yaqlı Bezneñ Ukraina-Xalıq Zzsaqlanuı 14 protsent cıyıp öçençe urında.

Yäkşämbe kiçendä saylaw urınnarındağı ğäyre räsmi fiker beleşü näticäläre iğlan itelgäç tä Timoşenko Parlamentta prezident yawlı blok belän xökümät koalitsiäse tözü öçen tawışlar citäçäk dip ciñü iğlan itte. Timoşenko belän Yuşçenko 2004 yılğı Äflisun inqıylabın bergä oyıştırğan ide.

Ämma xalqınıñ kübese Yanukoviçnı yaqlağan könçığış häm könyaq töbäklärdän soñarıbraq kilüçe saylaw näticäläre alarnıñ ciñügä ışanıçın kimetä başladı. Timoşenko Yuşçenko tawışları xäzer Yanukoviç koalitsiäsenekennän bik azğa ğına artığraq.

Düşämbe könne Kievta üz tarafdarları cıyılğan mitingta çığış yasap Yanukoviç yaña xökümät oyıştıru eşen Regionnar firqäse citäkliäçäk dide.

"Tağın ber märtäbä xökümät oyıştıraçaqbız. Xalıq ışanıçı xökümäte oyıştıraçaqbız. Häm ul xökümätne Regionnar firqäse citäkçelegendäge koalitsiä töziäçäk" dide Yanukoviç.

Yanukoviçnıñ koalitsiä tözü mömkinlege Sotsialist firqäneñ parlamentqa kerü öçen zarur bulğan 3 protsent kirtäsen ütä aluına bäyle bulaçaq. Älegä isä sotsialistlar 2.9 protsent qına cıydı. Ul koalitsiägä şulay uq komunistlarnıñ kerüe zarur.

Elekke parlament räise Volodımır Lıtvınnıñ urtaçıl blogı da kiräk bulaçaq Yanukoviçqa.

Lıtvın bloge kötelmägändä 4 protsent cıydı. Häm ul yä tege yä yaqqa quşılu mömkilegen belderde.

Yewropa Saylawlarnı Küzätü Oyışmaları Çeltäre wäkilläre üzläreneñ berençel xisabında üzläre bulğan tawış birü urınnarınıñ öçtän berendä diärlek saylawçılar isemlekläreneñ tärtiptä bulmağanlığın kürülären belderde.

Andıy citeşsezleklär kem yağına bulsa da zıyanğa bulğanmı, ällä barlıq yaqlar da üz tawışların yuğaltqanmı älegä açıq tügel.

Şulay da Timoşenko yağı Könçığış Ukrainadan kilgän Yanukoviçnı yaqlawçı näticälärne kire qağu mömkinlegen belderde.

Düşämbe könne Yuşçenko ul töbäktä näticälärne äweş-täweş kiterügä bäyle bulırğa mömkin kiçekterülärne tiz arada tikşerergä çaqırdı.

"Min xoquq saqlaw oyışmalarına saylaw urınnarınnan tawışlarnı sanaw xisaplarınıñ soñaruı säbäplären häm şartların kiçekmästän tikşerä başlarğa quşam. Min xärämläşü aşa parlamentqa kerergä tırışuçılarğa açıq häm añlayışlı itep äytäm. Minem ğämällärem süzläremnän ayırılmıyaçaq. Xärämläşüçelär cäzağa tartılaçaq. Qanunğa häm üz yazmışığızğa qarşı barmağız. Saylawçılarnıñ çın telägen berkem dä almaştıra almıyaçaq. Min Ukraina demokratiäseneñ ciñüenä häm berläşüenä nıqlı ışanam" dide Yuşçenko.

Yanukoviç ta saylaw näticälären üzgärülärgä qarşı kisätü belän cawap birde.

"Ukraina demokratik il. Bez demokratik saylawlar ütkärdek häm bez bügen qatğıy räweştä üzebez saylağannı yaqlarğa cıyınuıbıznı, häm beräwgä dä saylaw näticälären üzgärtergä yul quyılmıyaçağın belderergä tieşbez" dide Yanukoviç.

Yuşçenko häm Tımoşenko yaqlı köçlärneñ koalitsiä tözüe 2004 yılğı Äflisun iqıylabınnan soñğı törkemneñ xakimiätkä qaytuın añlataçaq.

Ämma alarnıñ uzğan atnada televideniedän kürsätelgän qoçaqlaşuına qaramastan üzara qarşılıqların onıta alaçaqlarına şiklär qala birä.

2005 yılda uzara korrupsiädä häm tieşençä eşli almawda ğäyepläşülärdän soñ Yuşçenko Timoşenkonı xökümät citäklegennän aldı. Bu isä berazdan Yanukoviçnıñ premyer ministr buluına yul açtı.

Naif Aqmal
XS
SM
MD
LG