2001/2002 uqu yılı tämamlandı: imtixan ütkärüdä yañalıqlar

Ministrlar Kabinetında atnalıq sişämbe brifinğı 2001/2002 uqu yılı yomğaqlarına bağışlandı. Süz kübräk mäktäplärdä, gimnaziälärdä imtixan ütkärüdä yañalıqlar turında bardı. Mäğlüm ki, bıyıl yazma eşlär temaları televidenie häm radio aşa lototronda uynatıla. Düşämbe könne irtän Tatarstan televideniesendä maxsus komissiä qarşında 35 san yazılğan şarlar lototronda äyländerep, 13 sanın tartıp çığardılar. Anda rus tele häm ädäbiätennän soçinenie yazu öçen 8 tema kürsätelgän ide. Qazanda, başqalada bu yañalıqnı uñay qabul itsälär (här mäktäptä televizorlar bar, telefon elemtäse, FM-radioları eşläp tora) rayon, awıl cirendä bu yañalıqnı awır qabul ittelär. Yä televizorı yuq, yä ul watıq, şuña kürä awıl mäktäplärendä küzätep toru öçen maxsus uqıtuçılar bilgelände, problemalar kilep çıqtı. Awıl uqıtuçıları bu yañalıqnıñ närsäse belän uñay, yaxşı ikänen añlıy almıy intektelär. Xäyer, bıyılğı çığarılış sıynıf uquçıların inde başqa yañalıqlar belän intektermäslär. Bıyıl tizdän böten Rusiä buyınça kerteläçäk berdäm däwlät imtixanı digän yañalıqnı üzläşterü buyınça Tatarstanda eksperiment ütkärelmi. Qayber töbäklärdä, kürşe Çuwaşstanda, Ästerxan ölkäsendä bıyıl şundıy eksperimentlar ütkärelä ikän.